UQShU sammıti, ekijaqty kezdesý - Qazaqstan Prezıdentiniń Máskeýge sapary aıaqtaldy
2022 jylǵy 17 mamyr 01:44

UQShU sammıti, ekijaqty kezdesý - Qazaqstan Prezıdentiniń Máskeýge sapary aıaqtaldy

MÁSKEÝ. QazAqparat – Qazaqstan Prezıdenti Qasym-Jomart Toqaevtyń Máskeýge sapary aıaqtaldy, dep habarlaıdy QazAqparat.

Aqordanyń baspasóz qyzmetinen málim etkendeı, Memleket basshysy mingen ushaq elge attandy.

15 mamyr kúni Qasym-Jomart Toqaev Reseı Prezıdenti Vladımır Pýtınniń jáne UQShU Ujymdyq qaýipsizdik keńesiniń tóraǵasy, Armenııa Premer-mınıstri Nıkol Pashınıannyń shaqyrýymen Ujymdyq qaýipsizdik shartyna qol qoıylǵanyna 30 jyl jáne Uıymnyń qurylǵanyna 20 jyl tolýyna oraı ótetin mereıtoılyq sammıtke qatysý úshin Máskeýge barǵan bolatyn.

UQShU-ǵa múshe elder basshylarynyń kezdesýi 16 mamyr kúni Kremlde ótti. Sammıtke Qazaqstan Prezıdentinen basqa, Armenııanyń Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Reseı Prezıdenti Vladımır Pýtın, sondaı-aq UQShU-nyń bas hatshysy Stanıslav Zas qatysty.

Qasym-Jomart Toqaev kezdesýde sóılegen sózinde beıbitshilik pen turaqtylyqty, halyqaralyq jáne aımaqtyq qaýipsizdikti saqtaý, múshe memleketterdiń aýmaqtyq tutastyǵy men egemendigin qorǵaý UQShU-nyń basty mindeti ekenin atap ótti.

Sondaı-aq halyqaralyq terrorızm men ekstremızmge, zańsyz esirtki jáne qarý-jaraq aınalymyna, kóshi-qonǵa, sonyń ishinde Aýǵanstandaǵy ahýaldyń órshýine qarsy is-qımyl máselelerine erekshe nazar aýdardy. «Aýǵanstandaǵy jaǵdaı, sondaı-aq osy eldiń aýmaǵyndaǵy qarýly toptardyń belsendi áreketi memleketterimizdiń qaýipsizdigi men turaqtylyǵyna qater tóndirip otyr. UQShU barlyq yqtımal qaýip-qaterlerdi eskerip, Ortalyq Azııanyń ońtústik shekaralarynyń qaýipsizdigin qamtamasyz etýge kóbirek kóńil bólýi kerek dep esepteımin», – dedi Qazaqstan Prezıdenti.

Q.Toqaev UQShU bitimgershilik kúshteriniń áleýetin nyǵaıtý jóninde aıtty.

«Bizdiń oıymyzsha, qazirdiń ózinde UQShU-ny BUU-nyń bitimgershilik qyzmetimen baılanystyrý mindetin kún tártibine qoıý qajet. Bul qadam Ujymdyq qaýipsizdik sharty uıymynyń sýbekt retindegi quqyǵyn nyǵaıtady. Sondaı-aq Uıymnyń beıbitshilikti saqtaý jónindegi halyqaralyq bitimgershilik operatsııalarǵa qatysý tájirıbesin qamtamasyz etedi», – dedi Memleket basshysy.

Reseı Prezıdenti Vladımır Pýtın atap ótkendeı, bıyl kúzde UQShU-ǵa múshe úsh eldiń - Qazaqstan, Qyrǵyzstan jáne Tájikstan aýmaǵynda oqý-jattyǵý jıyny ótedi.

«Qazirgi kezeńde UQShU qyzmetin ári qaraı jetildirý jáne onyń basshylyq qurylymdaryn ońtaılandyrý máselesi - birinshi kezektegi mańyzdy sharýa ekeni tolyǵymen qısyndy. UQShU ujymdyq kúshterin zamanaýı qarýmen jáne tehnıkamen jaraqtandyrý, jaýyngerlik kontıngenttiń operatıvti sáıkestigin ulǵaıtý, bizdiń áskerı qurylymdar men arnaıy qyzmetterdiń birlesken áreketiniń úılesimdiligin jaqsartý máselelerimen de aınalysamyz. Tıisti máseleler turaqty negizde UQShU jelisi boıynsha ótetin áskerı oqý jıyndarynda pysyqtalyp otyrady», - dedi Reseı basshysy.

Sonymen qatar V.Pýtın oqý jıynyn odan ári keńeıtý nıeti baryn jetkizdi.

«Bıyl kúzde Qazaqstanda, Qyrǵyzstanda jáne Tájikstanda bizdiń uıymnyń oqý jıyndarynyń tutas serııasyn ótkizý josparlanǵan. Bul sharalar memleketterimizdiń áskerı daıyndyǵy men áskerı qurylymdarynyń úılesimdiliginiń artýyna, jalpy bitimgerlik áleýettiń kúsheıýine múmkindik týǵyzatynyna senimdimin», - dedi RF Prezıdenti.

Kezdesý qorytyndysy boıynsha UQShU-ǵa múshe memleketterdiń basshylary Ujymdyq qaýipsizdik keńesiniń mereıtoılyq málimdemesin qabyldady.

UQShU elderi basshylarynyń sammıtinen keıin Qasym-Jomart Toqaev pen V.Pýtın kezdesý ótkizdi.

Prezıdentter ekijaqty kún tártibindegi ózekti máselelerdi, sondaı-aq saýda-ekonomıkalyq saladaǵy Qazaqstan-Reseı yntymaqtastyǵyn talqylady.

«Shyn máninde, elderimiz arasyndaǵy saýda-ekonomıkalyq jáne saıası yqpaldastyqtyń qarqyny nashar deýge esh negiz joq. Taýar aınalymy 25 mıllıard dollarǵa jetti. Reseı – Qazaqstan úshin saýda-ekonomıkalyq saladaǵy basty seriktes. Osy sebepti, men, Úkimetimizge osy qarqyndy jáne saýda men ınvestıtsııalar kólemin saqtap qana qoımaı, qazirgi geosaıası jaǵdaıdaǵy barlyq qıyndyqtarǵa qaramastan olardy arttyrý jóninde mindet júkteımin. Men ózimmen birge osy salaǵa jaýapty Premer-Mınıstrdiń birinshi orynbasary bastaǵan Úkimettiń negizgi sheneýnikterin ala keldim. Olar tabysty kelissózder júrgizdi jáne naqty nátıjege qol jetkizý úshin olardyń aldyna Federatsııasynyń Úkimetimen iskerlik baǵytta jumys isteý mindeti qoıyldy jáne olar nátıjeli kellisóz ótkizdi», – dedi Qasym-Jomart Toqaev.

Óz kezeginde Reseı Prezıdenti eki el arasyndaǵy saýda-ekonomıkalyq yntymaqtastyqty damytýdyń oń qarqynyn atap ótti.

«Jalpy bizde barlyq sala jaqsy damyp keledi. Byltyr taýar aınalymynyń ósimi 34 paıyz boldy. Reseı kompanııalary Qazaqstan ekonomıkasyna 17 mıllıard dollar ınvestıtsııa saldy. Bárimizge túsinikti ári belgili qazirgi qıynshylyqtarǵa qaramastan, jaǵdaı jaqsy damýda», – dedi Vladımır Pýtın.

Q.Toqaev Vladımır Pýtınniń shaqyrýy boıynsha bıylǵy maýsym aıynda Peterbýrgte ótetin ekonomıkalyq forýmǵa qatysatynyn qýattady.

Aıta keteıik, Ujymdyq qaýipsizdik týraly shartqa (UQT) 1992 jylǵy 15 mamyrda Tashkentte qol qoıyldy. 2002 jylǵy 14 mamyrda Ujymdyq qaýipsizdik keńesiniń Máskeýde ótken sessııasynda Ujymdyq qaýipsizdik týraly shartqa qatysýshy memleketter arasyndaǵy yntymaqtastyqtyń tetikteri men qurylymdaryn halyqaralyq aımaqtyq uıym – «Ujymdyq qaýipsizdik shart týraly uıymǵa» ózgertý, oǵan tıisti mártebe berý týraly sheshim qabyldady. 2003 jylǵy 18 qyrkúıekte UQShU Jarǵysy óz kúshine endi. Ujymdyq qaýipsizdik shart uıymyna Qazaqstan, Armenııa, Belarýs, Qyrǵyzstan, Reseı, Tájikstan kiredi.

2022 jyly UQShU-ǵa Armenııa Respýblıkasy tóraǵalyq etip jatyr.










Uqsas jańalyqtar
Avtor:
Tilshi

Jańalyqtar

MURAǴAT