Úkimet eldegi áleýmettik-ekonomıkalyq ahýaldy turaqtandyrý jónindegi jospar jobasyn bekitti
2022 jylǵy 18 qańtar 09:47

Úkimet eldegi áleýmettik-ekonomıkalyq ahýaldy turaqtandyrý jónindegi jospar jobasyn bekitti

NUR-SULTAN. QazAqparat – Búgin Úkimet otyrysynda Ulttyq ekonomıka mınıstri Álibek Qýantyrov «Qazaqstan Respýblıkasyndaǵy áleýmettik-ekonomıkalyq jaǵdaıdy turaqtandyrý jónindegi jedel is-qımyldar josparyn bekitý týraly» QR Úkimeti qaýlysynyń jobasyn tanystyrdy, dep habarlaıdy QazAqparat tilshisi.

«Memleket basshysynyń tapsyrmasyn oryndaý maqsatynda Ulttyq ekonomıka mınıstrligi ortalyq memlekettik organdarmen jáne uıymdarmen birlesip, «Qazaqstan Respýblıkasyndaǵy áleýmettik-ekonomıkalyq jaǵdaıdy turaqtandyrý jónindegi jedel is-qımyldar josparyn bekitý týraly» Qazaqstan Respýblıkasynyń Úkimeti qaýlysynyń jobasyn ázirledi. Jospar qoǵamdyq tártip pen qaýipsizdikti qalpyna keltirý, áleýmettik jáne basqa da ınfraqurylymdar, áleýmettik máseleler, baǵanyń negizsiz ósýine jol bermeý, halyq pen kásipkerlikti qoldaý ári uıymdastyrý-qarjy máseleleri boıynsha 51 is-sharadan turady», - dedi Álibek Qýantyrov.

Onyń aıtýynsha, qoǵamdyq tártip pen qaýipsizdikti, áleýmettik jáne basqa da ınfraqurylymdy qalpyna keltirý baǵyty boıynsha Josparda 11 is-shara kózdelgen.

«Osylaısha, Memleket basshysynyń kúsh qurylymdary qyzmetkerleriniń jaýyngerlik ázirligin arttyrý jáne moraldyq rýhyn qoldaý, zaqymdalǵan jyljymaıtyn múlik obektilerin, sondaı-aq kúsh qurylymdarynyń, densaýlyq saqtaý, bilim berý jáne kommýnaldyq sharýashylyq salalarynyń materıaldyq-tehnıkalyq bazasyn qalpyna keltirý jónindegi tapsyrmalaryn iske asyrý kózdelgen», - dedi mınıstr.

Budan bólek, áleýmettik máseleler baǵyty boıynsha 10 is-sharany iske asyrý josparlanýda. Olar jaraqat alǵan tıisti organdardyń qyzmetkerlerine ótemaqy tóleýdi, qaza tapqan osy organdar men beıbit azamattardyń otbasylaryna kómek kórsetýdi, bıznes pen halyqqa borysh júktemesin azaıtý sharalaryn, muqtaj azamattarǵa turǵyn úı kómegin kórsetýdiń jańa tártibi men tetigin engizýdi qamtıdy.

«Baǵanyń negizsiz ósýine jol bermeý baǵytynda 15 is-sharany iske asyrý josparlanǵan. Bul is-sharalar suıytylǵan munaı gazyn ótkizýdiń jańa tetigin ázirleýdi, áleýmettik mańyzy bar azyq-túlik taýarlarynyń baǵalaryn turaqtandyrý jónindegi forvardtyq tetikterdi qarjylandyrýdy ulǵaıtýdy jáne kómir baǵasynyń ósýine jol bermeý sharalaryn qamtıdy. Halyqty jáne kásipkerlikti qoldaý baǵyty boıynsha 7 is-sharany iske asyrý kózdelgen. Máselen, bastalǵan salyqtyq tekserýlerdi, kedendik tekserýlerdi 2022 jylǵy 1 aqpanǵa deıingi merzimde toqtata turý jáne keıinge qaldyrý, kádege jaratý alymynyń mólsherlemeleri men tásilderin qaıta qaraý, 2022 jylǵy 20 sáýirge deıingi kezeńge qurylystardy kóshirýge, ornalastyrýǵa, buzýǵa baılanysty atqarýshylyq áreketterdi júrgizýge ýaqytsha tyıym salýdy engizý josparlanýda», - dedi vedomstvo basshysy.

Onyń sózine qaraǵanda, uıymdastyrý-qarjylyq máseleler baǵyty boıynsha 8 is-sharany iske asyrý josparlanýda. Olar teńgege degen senim tolyq qalpyna kelgenshe valıýta naryǵynyń turaqtylyǵyn qamtamasyz etýdi, batys óńirler úshin Áleýmettik-ekonomıkalyq damýdyń keshendi josparlaryn ázirleýdi nemese ózektilendirýdi, jappaı tártipsizdikter saldaryn joıý jónindegi is-sharalardy qarjylandyrýmen qamtamasyz etý úshin 2022 jylǵa arnalǵan respýblıkalyq bıýdjetti naqtylaýdy qamtıdy.

«Usynylǵan jedel is-qımyl jospary Memleket basshysynyń tapsyrmalaryn eskere otyryp, aldaǵy birneshe aıda memlekettik organdardyń tıisti mindetterdi úılestire sheshýine baǵyttalǵan. Jospardy iske asyrý eldegi ekonomıkalyq ahýaldy qalpyna keltirýge jáne kúndelikti ómirge qaıta oralýǵa alyp keledi. Joba Qarjy, Ádilet mınıstrlikterimen, sonymen qatar basqa memlekettik organdar men uıymdarmen kelisildi», - dedi Álibek Qýantyrov.

Talqylaýdan keıin Úkimet músheleri atalǵan qujat jobasyn maquldady.


Avtor:
Tilshi

Jańalyqtar

MURAǴAT