Túrkistanda bir jasar sábıin 7 mln teńgege satpaq bolǵan áıel sottaldy
2022 jylǵy 20 mamyr 21:44

Túrkistanda bir jasar sábıin 7 mln teńgege satpaq bolǵan áıel sottaldy

TÚRKІSTAN. QazAqparat - Túrkistanda bir jasar sábıin satpaq bolǵan áıelge qatysty sot úkimi shyqty. Oblystyq kámeletke tolmaǵandar isteri jónindegi mamandandyrylǵan aýdanaralyq sotynyń úkimimen jas kelinshek 6 jylǵa bas bostandyǵynan aıyryldy, dep habarlaıdy QazAqparat tilshisi.

Aıyptalýshy ótken jyly balasyn satý kezinde ustalǵan bolatyn.

Qaraǵandy oblysynyń 27 jastaǵy turǵyny óziniń materıaldyq jaǵdaıyn jaqsartý úshin bir jasar ulyn satpaq bolǵan edi.

Ol óziniń bul oıyn Túrkistan qalasynda notarıýs bolyp jumys isteıtin tanys áıelge aıtqan.

Alaıda bul habardy notarıýstan estigen quzyrly organ ókilderi «satyp alýshyny» taýyp, kúdiktini qylmys ústinde qolǵa túsirgen bolatyn.

Jas kelinshek ulyn 7 mln teńgege baǵalaǵan.

Osy qylmystyq quqyq buzýshylyq týraly aqparatqa baılanysty Túrkistan qalasy prokýratýrasynyń bastamasymen Qazaqstan Respýblıkasynyń Qylmystyq kodeksiniń 135-baby 2-bóliginiń 12-tarmaǵymen sotqa deıingi tergep-tekserý sharalary júrgizildi.

Sotqa deıingi tergeý barysynda balanyń anasynyń qylmystyq áreketteri dálelin taýyp, is sotqa joldanǵan bolatyn.

Búginde sot úkimi zańdy kúshine endi. Al, bala bóbekter úıine jiberilgen.


Jańalyqtar

MURAǴAT