SQO-da rýlge mas otyrǵan 27 júrgizýshige qatysty qylmystyq is qozǵaldy
2022 jylǵy 20 mamyr 02:18

SQO-da rýlge mas otyrǵan 27 júrgizýshige qatysty qylmystyq is qozǵaldy

PETROPAVL. QazAqparat – Soltústik Qazaqstan oblysynda bıyl kólikti qaıta mas kúıde basqarǵany úshin 27 adamǵa qylmystyq is qozǵaldy, 10-y bas bostandyǵynan aıyryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jaqynda Petropavldyń 32 jastaǵy turǵyny kólik basqarý quqyǵynan ómir boıyna aıyrylyp, 4,5 jylǵa qamaýǵa alyndy.

«2021 jyldyń qyrkúıeginde buryn kólik júrgizý quqyǵynan aıyrylǵan er adam mas kúıinde jol-kólik oqıǵasyn jasady. Oqıǵa tańǵy saǵat 4.00 shamasynda Qazaqstan Konstıtýtsııasy men Jambyl kósheleriniń qıylysynda bolǵan. Kóliktiń salonynda úsh jolaýshy kele jatqan. Soqqy saldarynan bir adam oblystyq aýrýhanada qaıtys boldy. Atalǵan fakti boıynsha polıtseıler QR QK 346-baby 5-bóligi boıynsha materıal jınastyrdy. Qazirgi ýaqytta júrgizýshi bas bostandyǵynan aıyryldy», - deıdi SQO PD Anyqtaý basqarmasy bastyǵynyń mindetin atqarýshy Jeńis Temirbekov.

Jalpy bıyl kólikti qaıta mas kúıde basqarǵan 27 júrgizýshiniń 19-yna qatysty qylmystyq ister sotqa joldandy. 10-yna qatysty bas bostandyǵynan aıyrý týraly úkim shyǵaryldy, 9-y qaralyp jatyr, qalǵandary óndiriste. QR Qylmystyq Kodeksiniń 346-baby «Kólik quraldaryn júrgizý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese osyndaı adamnyń kólik quralyn basqarýǵa jiberý» boıynsha ómir boıyna kólik quralyn basqarý quqyǵynan jáne 7 jyldan 9 jylǵa deıin bas bostandyǵynan aıyrý túrindegi jaza kózdelgen.

Jyl basynan SQO joldarynda polıtseıler 381 mas júrgizýshini ustady. Jol qozǵalysy erejelerin buzýdyń 25 myńnan astam deregi tirkeldi. Bıyl óńir joldarynda 64 jol-kólik oqıǵasy bolyp, saldarynan 14 adam qaza tapty, 92 adam jaraqattandy.


Jańalyqtar

MURAǴAT