ShQO-da probatsııa qyzmetinen 5 jyl boıy jasyrynyp júrgen er adam ustaldy
2022 jylǵy 21 mamyr 08:35

ShQO-da probatsııa qyzmetinen 5 jyl boıy jasyrynyp júrgen er adam ustaldy

ÓSKEMEN. QazAqparat – Shyǵys Qazaqstan oblysynda probatsııa qyzmetinen 5 jyl boıy jasyrynyp júrgen er adam ustaldy, dep habarlaıdy QazAqparat tilshisi.

ShQO boıynsha Qylmystyq atqarý júıesi departamenti baspasóz qyzmetiniń málimetine súıensek, probatsııalyq esepte turǵan 30 jastaǵy azamat 5 jyl boıy izdestirildi.

«Er adam 2017 jyly urlyq jasaǵany úshin sottalǵan. Sot oǵan qatysty aıyptaý úkimin shyǵaryp, bas bostandyǵyn shekteý jazasyn taǵaıyndady. Alaıda esepke qoıylǵannan keıin sottalǵan adam probatsııa qyzmetiniń talaptaryn elemeı júrgen. Ol bes jyl boıy probatsııa qyzmetkerlerinen jasyrynyp júrgen», - delingen aqparatta.

Er adam Almaty qalasynda ustaldy. Belgili bolǵandaı, sol jaqta jaldamaly páterde turyp, kezdeısoq tabys taýyp ómir súrip kelgen.

«Sottalǵan probatsııalyq baqylaýdan jaltarǵany úshin bas bostandyǵyn shekteý jazasy bas bostandyǵynan aıyrýǵa aýystyrylýy múmkin. Tıisti materıaldar aýdandyq sotqa joldanatyn bolady», - dedi probatsııa qyzmetiniń bastyǵy Baýyrjan Tóleýhanov.

Esterińizge sala ketsek, osyǵan deıin Shyǵys Qazaqstanda memleketaralyq izdeýde júrgen eki qylmysker ustalǵanyn habarlaǵan edik.



Jańalyqtar

MURAǴAT