Saıası partııa qurý tártibi jeńildetilip jatyr
2022 jylǵy 18 mamyr 17:28

Saıası partııa qurý tártibi jeńildetilip jatyr

NUR-SULTAN. QazAqparat – Prezıdenttiń partııadan shyǵýy saıası básekelestikti arttyrady, barlyq partııalardyń damýy úshin teń jaǵdaılar jasaıdy. Bul týraly Konstıtýtsııalyq keńestiń apparat basshysy, Konstıtýtsııaǵa engiziletin ózgerister men tolyqtyrýlar jóninde usynystar daıyndaý boıynsha jumys tobynyń múshesi Baqyt Nurmuhanov málim etti, dep habarlaıdy QazAqparat tilshisi.

«Qazir jobada Prezıdent saıası partııadan shyǵady dep kórsetilgen. Memleket basshysy konstıtýtsııalyq reformadan buryn partııadan shyqty. Bul óz kezeginde saıası básekelestikti arttyrady. Bolashaqta Saıası partııalar týraly zańǵa da ózgerister engiziledi. Saıası partııa qurý tártibi edáýir jeńildetilip jatyr. Sondyqtan saıası arenada jańa saıası kúshter paıda bolyp, ókildi organdarda jańa depýtattar saılanýy yqtımal», - dedi Baqyt Nurmuhanov Ortalyq kommýnıkatsııalar qyzmetinde.

Budan buryn habarlanǵandaı, bıyl Joldaýda Memleket basshysy Qasym-Jomart Toqaev Prezıdent óziniń ókilettigin atqarý kezeńinde partııaǵa músheligin toqtata turýǵa mindetti ekenin zań júzinde resimdeýdi usyndy.

Bıyl sáýir aıynda AMANAT partııasynyń tóraǵasy retinde Prezıdenttiń ókilettigi toqtady.

«Men buǵan deıin partııa tóraǵasy laýazymynan bosap, uıym qatarynan shyǵatynymdy aıttym. Osy uıǵarymdy júzege asyratyn kez keldi. Búginnen bastap AMANAT partııasynyń tóraǵasy retinde ókilettigimdi toqtatyp, partııadan shyǵý týraly sheshim qabyldadym. Bul qadamnyń sımvoldyq máni bar. Osy oraıda Prezıdent saılaýynda maǵan senim artyp, qoldaǵandaryńyz úshin barshańyzǵa alǵysymdy aıtqym keledi. Sondaı-aq jaýapty sátte partııa tizginin senip tapsyrǵandaryńyz úshin rızashylyǵymdy bildiremin», - dedi Memleket basshysy.


Uqsas jańalyqtar
Avtor:
Tilshi

Jańalyqtar

MURAǴAT