Roman Sklıar nemis kompanııalarynyń basshylarymen onlaın-kelissóz júrgizdi
2022 jylǵy 26 qańtar 19:58

Roman Sklıar nemis kompanııalarynyń basshylarymen onlaın-kelissóz júrgizdi

NUR-SULTAN. QazAqparat - Qazaqstan Respýblıkasy Premer-Mınıstriniń Birinshi orynbasary Roman Sklıar Germanııanyń iri kompanııalarynyń basshylarymen onlaın-keńes ótkizdi, dep habarlaıdy QazAqparat Úkimettiń resmı saıtyna silteme jasap.

Іs-shara Qazaqstan-Germanııa saýda-ekonomıkalyq jáne ınvestıtsııalyq yntymaqtastyǵyn tereńdetý, «jasyl ekonomıkany» damytý, birlesken jobalardy júzege asyrý, sondaı-aq nemis ınvestorlarynyń quqyqtaryn qorǵaý sharalaryna arnaldy.

Onlaın kezdesýge nemis kompanııalarynyń jáne olardyń Qazaqstandaǵy fılıaldarynyń, sonyń ishinde Svevind Group, Volkswagen, Siemens, Deutsche Bank, Knauf, Deutsche Bahn AG jáne t. b. 90-ǵa jýyq basshylary men qyzmetkerleri qatysty. Sonymen qatar is-sharaǵa Germanııa Federatıvtik Respýblıkasynyń Qazaqstandaǵy elshisi M. Iversen, Germanııanyń federaldy memlekettik organdarynyń, salalyq jáne aımaqtyq bıznes qaýymdastyqtarynyń ókilderi qatysty.


Roman Sklıar óz sózinde Germanııadan kelgen seriktesterdi Qazaqstandaǵy qazirgi qoǵamdyq-saıası jáne áleýmettik-ekonomıkalyq jaǵdaı, sondaı-aq Qazaqstan Respýblıkasynyń Prezıdenti Q. Toqaevtyń bastamalary men Úkimetiniń sharalary týraly habardar etti.

Qazaqstan Respýblıkasy turaqty ekonomıkalyq ósýdi, halyqtyń ál-aýqatyn qamtamasyz etý jáne ınvestorlardyń quqyqtaryn qorǵaý basty nazarda ekenin atap ótti. Ol Qazaqstan úshin sheteldik áriptestermen yntymaqtastyq erekshe mańyzdy ekenin atap ótip, nemis seriktesterin barlyq mindettemeler men kepildikter múltiksiz jáne tolyq kólemde oryndalatynyna sendirdi. Nemis bıznesiniń ókilderi ESG talaptarynyń artýy, jahandyq energetıkalyq jáne tehnologııalyq aýysý jaǵdaıynda Qazaqstannyń ınvestıtsııalyq tartymdylyǵyn arttyrý úshin jańa Investıtsııalyq saıasat tujyrymdamasyn ázirleý týraly habardar boldy. Óz kezeginde WILO SE prezıdenti jáne basqarma tóraǵasy, Germanııa ekonomıkasynyń Shyǵys komıtetiniń tóraǵasy O. Germes Germanııanyń aımaqtaǵy basty seriktesi Qazaqstanmen yntymaqtastyqtyń mańyzdylyǵyna toqtaldy.

Onyń aıtýynsha eldiń turaqty energııa óndirýge úlken áleýeti bar jáne Germanııa úshin qalaýly seriktes bolyp tabylady. Osy turǵyda ol nemis bıznes-qaýymdastyǵy Qazaqstan Prezıdentiniń bastamalaryn qoldaıtynyn jáne elimizdiń damýyna úles qosatynyn basa aıtty. Olıver Germes sondaı-aq osy jyldyń mamyr aıynda nemis bıznes-delegatsııasymen Qazaqstanǵa iskerlik saparmen kelýge nıetti ekenin málimdedi. Sondaı-aq nemis bıznesiniń ókilderi sońǵy oqıǵalardyń Qazaqstandaǵy kompanııalardyń aǵymdaǵy jáne bolashaqtaǵy ınvestıtsııalyq josparlaryna áser etpegenin atap ótip, ınvestıtsııalyq ahýaldy jaqsartý boıynsha júrgizilip jatqan saıasatty qoldaıtynyn bildirdi.

Elshi M. Iversen, sondaı-aq CLAAS, Deutsche Bahn jáne Svevind Energy basshylary da el basshylyǵynyń jaǵdaıdy turaqtandyrý jáne azamattardyń ál-aýqatyn jaqsartý boıynsha qabyldap jatqan sharalaryn qoldady. Olar Qazaqstan Respýblıkasymen birlesken jobalardy júzege asyrý boıynsha yntymaqtastyqty jalǵastyratyndaryn aıtty. Sońynda «suraq-jaýap» formatynda pikirtalas ótip, qatysýshylar praktıkalyq máselelerdi júzege asyrýdy talqylady.


Jańalyqtar

MURAǴAT