Prezıdenttiń Túrkııaǵa memlekettik sapary aıaqtaldy

ANKARA. QazAqparat - Memleket basshysyn Ankaranyń halyqaralyq áýejaıynda Túrkııanyń vıtse-prezıdenti Fýat Oktaı shyǵaryp saldy, dep habarlaıdy QazAqparat Aqordanyń baspasóz qyzmetine silteme jasap.

Eki kúnge sozylǵan memlekettik sapardyń negizgi túıini - Túrkııa Prezıdenti Rejep Taııp Erdoǵanmen júrgizilgen jan-jaqty kelissózder nátıjesinde Qazaqstan-Túrkııa qarym-qatynasyn keńeıtilgen strategııalyq áriptestik deńgeıine kóterý týraly kelisimge qol jetkizildi. Sonymen qatar, ártúrli salalarda yntymaqtastyqty nyǵaıta túsetin birqatar mańyzdy úkimetaralyq kelisimderge qol qoıyldy.

Sondaı-aq, Memleket basshysy túrik bıznesiniń iri ókilderimen kezdesti. Olarmen kezdesý eki el arasyndaǵy saýda-ekonomıkalyq jáne ınvestıtsııalyq yntymaqtastyqty nyǵaıtýǵa septigin tıgizeri sózsiz ekenin aıtty. Qasym-Jomart Toqaev atap ótkendeı, qol jetkizilgen barlyq ýaǵdalastyqtyń oryndalýy onyń jeke baqylaýynda bolady.

Byltyr Túrkııanyń tikeleı ınvestıtsııasy rekordtyq kórsetkishke jetip, 680 mıllıon dollar boldy. Bul týraly Prezıdent Qasym-Jomart Toqaev Qazaqstan men Túrkııa bıznes ókilderiniń basqosýynda aıtty.

Qasym-Jomart Toqaev Túrkııa ınvestorlaryna qoldaý kórsetiletinin jetkizdi.

Aıta keteıik, Prezıdent Qasym-Jomart Toqaev Túrkııa Prezıdenti Rejep Taıyp Erdoǵannyń shaqyrýymen Túrkııa Respýblıkasyna memlekettik saparmen bardy.

Qasym-Jomart Toqaevtyń Túrkııa Respýblıkasyna memlekettik sapary Túrkııanyń negizin qalaýshy ári tuńǵysh Prezıdenti Mustafa Kemal Atatúriktiń rýhyna taǵzym etýden bastaldy.

Prezıdent saraıynda saltanatty túrde Memleket basshysy Qasym-Jomart Toqaevty resmı qarsy alý sharasy ótti.

Uqsas jańalyqtar

Erdoǵan ormanǵa órt qoıǵandarǵa jazany kúsheıtý ıdeıasyn qoldady

Memleket basshysy grek-rım kúresi federatsııasynyń prezıdenti Dáýlet Turlyhanovty qabyldady