Petropavlda memleket menshigine ótken «Qalyńdyq úıi» kúrdeli jóndeýden ótedi
2022 jylǵy 17 qańtar 13:48

Petropavlda memleket menshigine ótken «Qalyńdyq úıi» kúrdeli jóndeýden ótedi

PETROPAVL. QazAqparat – Petropavldaǵy «Kópes ıAngýrazovtyń úıi» nemese halyq arasynda «Qalyńdyq úıi» atalyp ketken biregeı sáýlet eskertkishi memleket menshigine qaıtarylyp, endi qujattary jónge kelisimen kúrdeli jóndeý jumystary bastalady, dep habarlaıdy QazAqparat tilshisi.

Petropavldaǵy «Kópes ıAngýzarovtyń úıi» byltyr qarasha aıynda memleket menshigine ótti.

Qazaqstan musylmandary dinı basqarmasynyń oblystyq fılıaly balansynda turǵan kóne ǵımaratty jergilikti bılik satyp aldy.

Munda tarıhı-mádenı murany qorǵaý jáne paıdalaný ortalyǵy ornalaspaq.

2013 jyly «Mádenı mura» memlekettik baǵdarlamasy aıasynda nysandy qaıta qalpyna keltirýge respýblıka qazynasynan 60 mln astam teńge jumsaldy. Bul qarajatqa shatyry aýystyrylyp, úıdiń qasbeti, ishi jónge keltirildi.

Alaıda respýblıkalyq mańyzy bar eskertkishterdiń qataryna engen ǵımarattyń búgingi jaǵdaıy kóńil kónshitpeıdi.

«Halyq «Qalyńdyq úıi» atap ketken nysannyń óz tarıhy men biregeı arhıtektýralyq kelbeti bar. Ǵımarat erekshe salynǵan, modern stılinde turǵyzylǵan. Bizge jetken málimet boıynsha ıtalııalyq sáýletshiniń qatysýymen salynǵan. Kóne ǵımarattyń qabyrǵalary bıik, emen esikteri men úlken terezeleri saqtalǵan. Iran plıtkalary ornynda tur. Qazir qujattary durystalǵasyn ǵımarattyq qasbetin, ishin, qabyrǵalaryn, shatyryn, eń bastysy káriz júıesin qalpyna keltirý josparda bar. Osy jyly bul jumystardy atqaramyz dep otyrmyz», - deıdi tarıhı-mádenı murany qorǵaý boıynsha bólimniń meńgerýshisi Janat Baımúsenov.

«Qalyńdyq úıi» týraly el arasynda ańyz kóp.

Sonyń biri - jergilikti kópes Halıt ıAngýrazov Sankt-Peterbýrgte issaparmen júrip ótip, bir boıjetkenge ǵashyq bolady. Ol sulýǵa sezimin bildirip, úılenbek nıetin jetkizedi.

Baıdyń sholjań ósken erke qyzy Petropavlda ákesinikindeı úı salsa ǵana saýdagerge kúıeýge shyǵatynyn aıtady.

ıAngýrazov qyzdyń talabyn oryndaý úshin Italııadan arnaıy sáýletshi aldyryp, ásem ǵımaratty salǵyzady.

Ańyzdardyń birinde Halıttiń úılený toıynan úsh kún buryn qaıtys bolǵandyǵy aıtylsa, endi birinde oqıǵa sátti aıaqtalyp, erli-zaıyptylar uzaq jáne baqytty ómir súrgen eken.

Taǵy bir nusqasynda saýdager úıdi salý úshin bar jıǵan-tergenin jumsap, qalǵan ǵumyryn kedeılikte ótkizgendigi aıtylady.

Ǵımarat tolyǵymen aǵashtan salynǵanymen syrtynan tastan qalanǵan sııaqty kórinedi. Keńes zamanynda kópestiń úıi Petropavl ákimshiligine berildi.

Bul ǵımaratta Sábıt Muqanov ta eńbek etken.

1960-shy jyldardan bastap oblystyq qarjy bólimi keıin taǵy birqatar memlekettik mekemeler ornalasty, bir jyldary munda medrese de ashyldy.

1982 jyldan bastap nysan sáýlet óneriniń eskertkishi qataryna engizilgen.


Jańalyqtar

MURAǴAT