Óskemende «Balalar – kitap áleminde» atty kórme ashyldy
2022 jylǵy 21 qańtar 20:32

Óskemende «Balalar – kitap áleminde» atty kórme ashyldy

ÓSKEMEN. QazAqparat – Óskemendegi ShQO Balalar jáne jasóspirimder kitaphanasynda «Balalar – kitap áleminde» atty kórme ashyldy, dep habarlaıdy QazAqparat tilshisi.

Memleket basshysy Qasym-Jomart Toqaev 2022 jyldy «Balalar jyly» dep jarııalaǵandyqtan ShQO Balalar jáne jasóspirimder kitaphanasy jyldy tyń ózgeristermen, jańa jobalarmen bastap jatyr. Osy oraıda búgin «Balalar – kitap áleminde» atty kitap kórmesi uıymdastyryldy.

Kórmege balalarǵa arnalǵan klassık jazýshylardyń týyndylary, halyq aýyz ádebıetiniń ozyq úlgileri, balalar entsıklopedııasy jáne búldirshinderge arnalǵan ertegi kitaptar qoıyldy. Sondaı-aq qyzyqty oqıǵalardy baıandaıtyn ár túrli baǵyttaǵy kitaptardan turatyn «Ádebı sandyq» óz oqyrmandaryna erekshe kóńil-kúı syılady. Oqýshylar osy kórmeni jyl kóleminde tamashalap, ózderin qyzyqtyrǵan kitaptaryn alyp oqı alady.

«Kitaphanamyzdyń kishkentaı oqyrmandary úshin ózderi sýretin salǵan, «Knıjkı-malyshkı» serııasymen shyqqan kitapshalar erekshe oryn alady. Bul bizdiń bolashaq sýretshilerimiz ben jazýshylarymyzdyń alǵashqy týyndylarynyń biri desek te bolady. Budan bólek jazýshy, jýrnalıst Marat Qabanbaevtyń «Jıhankez Tıtı» áńgimesin oqyrmandardyń suranysy boıynsha balalar jazýshysy, ustaz Baný Ahmetbekova orys tiline aýdardy. Bul kitapsha «VKPK ARGO» baspasynan basylyp shyǵyp, óz oqyrmandaryna jol tartty», - dedi kitaphana qyzmetkeri Talant Meırambaev.

Kitap kórmesiniń ashylýynda Qazaqstan Jazýshylar odaǵynyń Shyǵys Qazaqstan oblystyq fılıalynyń tóraǵasy, jazýshy Álibek Qańtarbaev jas oqyrmandardy ataýly jylmen quttyqtap, júrekjardy tilegin joldady.

«Adam balasynyń eń jaqyny da, eń jaqsy kóretini de – bala. Tipti ómirdiń sáni men máni de osy balada. Qazaqta «Balaly úı – bazar, balasyz úı – qý mazar», «Bala – adamnyń baýyr eti» degendeı maqal-mátelder óte kóp. Adam bolyp dúnıege kelgen soń, meıli erkek, meıli áıel bolsyn, menińshe bir ǵana muratpen ómir súretin shyǵar, ol – ómirge urpaq ákelý, artyńa urpaq qaldyrý. Urpaqsyz ómir tul. Jalpy, Prezıdentimizdiń bıylǵy jyldy «Balalar jyly» dep ataýy teginnen tegin emes. Halqymyz «El bolam deseń, besigińdi túze» deıdi. Besik degen – memleket. Sonyń saıasaty. Sonyń ıdeologııasy. Sondyqtan balaǵa bir jyldy ǵana arnap, sharýany bitirip tastadyq dep shirenýge bolmas. Bul taqyryp – Prezıdenttiń de, Parlamenttiń de, árbir ata-ananyń da kún tártibinde máńgilik turýy shart, - dedi qalamger.


Jańalyqtar

MURAǴAT