Ońtústikte elektr energııasyn óshirý sebebin tekserý úshin arnaıy komıssııa quryldy

NUR-SULTAN. QazAqparat – Qazaqstanda ońtústik óńirlerde elektr energııasyn óshirý sebepterin tekserý boıynsha arnaıy komıssııa quryldy. Bul týraly QR Energetıka mınıstrliginen málim etti, dep habarlaıdy QazAqparat tilshisi.

«Qazaqstan Respýblıkasy Energetıka vıtse-mınıstriniń basshylyǵymen ońtústik óńirlerdiń tutynýshylaryn elektrmen jabdyqtaýshy «KEGOC« AQ elektr jelilerinde tehnologııalyq buzýshylyqtyń týyndaýy jáne oryn alý sebepteri men sharttaryn shynaıy jáne jan-jaqty anyqtaý maqsatynda arnaıy komıssııa quryldy. Tekseris nátıjeleri boıynsha oryn alǵan tehnologııalyq buzýshylyqtarǵa aldaǵy ýaqytta jol bermeý, sondaı-aq Qazaqstan Respýblıkasynyń biryńǵaı elektr energetıkasy júıesiniń jumys isteý turaqtylyǵyn arttyrý jónindegi uıymdastyrýshylyq jáne tehnıkalyq is-sharalar ázirlenetin bolady», - dep atap ótedi mınıstrlikten.

Esterińizge sala keteıik, 25 qańtarda Almaty, Jambyl, Túrkistan, Qyzylorda oblystarynda jáne Almaty men Shymkent qalalarynda elektr energııasy apattyq jaǵdaıda ajyratyldy. Sol kúni saǵat 16:00-de Qazaqstannyń ońtústik aımaǵynyń barlyq óńirleriniń tutynýshylaryna jaryq qaıta berildi.