Ońtústik óńirlerge elektr energııasyn berý tolyq qalpyna keltirildi - KEGOC
2022 jylǵy 26 qańtar 12:16

Ońtústik óńirlerge elektr energııasyn berý tolyq qalpyna keltirildi - KEGOC

NUR-SULTAN. QazAqparat – Qazaqstannyń biryńǵaı energııa júıesiniń ońtústik aımaǵyn elektrmen jabdyqtaý tolyǵymen qalpyna keltirildi. Bul jaıynda «KEGOC» kompanııasynan málim etti, dep habarlaıdy QazAqparat tilshisi.

«Qazirgi ýaqytta ulttyq elektr jelisiniń qalypty syzbasy tolyǵymen qalpyna keltirildi. Qyrǵyzstan jáne Ózbekstannyń energııa júıesimen paralleldi jumys jolǵa qoıyldy. Saǵat 15:50-de (Nur-Sultan ýaqytymen) Almaty qalasy, Almaty, Túrkistan, Qyzylorda jáne Jambyl oblystary turǵyndaryn elektrmen jabdyqtaýǵa shekteýler tolyǵymen alyndy. «Qazfosat» jáne «TMZ» JShS-lerine ǵana elektr berilgen joq», - dep atap ótedi kompanııadan.

«KEGOC» málimetinshe, saǵat 20:41-de Jambyl oblysyn qosa alǵanda ońtústik aımaqtaǵy barlyq shekteýler alyndy. Qazaqstannyń biryńǵaı energııa júıesi qalypty rejımde jumys istep tur.

Esterińizge sala ketsek, 2022 jyldyń 25 qańtarynda saǵat 11.59-da (Nur-Sultan ýaqytymen) Ortalyq Azııa (Ózbekstan, Qyrǵyzstan) energııa júıesinde týyndaǵan aqaý saldarynan «Soltústik-Shyǵys-Qazaqstannyń ońtústigi» 500 kV elektr energııasy tranzıtine arnalǵan qýattyń tómendeýi oryn aldy.

Sonyń saldarynan Almatynyń birneshe aýdanynda elektr energııasy óship qaldy. Sondaı-aq Qyzylorda oblysynda elektr energııasyna baılanysty irkilis boldy.

Budan bólek, áleýmettik jelilerde jaryq Jambyl jáne Túrkistan oblystarynda da óshkeni týraly jazyldy.

Elektr energııasy Qazaqstanmen qatar, Ózbekstanda jáne Qyrǵyzstan elderinde de óshti.



Jańalyqtar

MURAǴAT