«ÓKM Operator» JShS basqarýshy dırektorynyń múrdesi tabyldy
2022 jylǵy 26 qańtar 13:05

«ÓKM Operator» JShS basqarýshy dırektorynyń múrdesi tabyldy

NUR-SULTAN. QazAqparat – «ÓKM Operator» JShS-niń basqarýshy dırektory Rýslan Shámshıevtiń múrdesi tabyldy. Bul aqparatty Nur-Sultan qalalyq Polıtsııa departamenti rastady, dep habarlaıdy QazAqparat tilshisi.

«Er adamnyń múrdesiniń tabylý faktisi boıynsha «Esil» aýdandyq polıtsııa bólimi QR Qylmystyq kodeksiniń 105-babymen qylmystyq is qozǵady. Qazirgi ýaqytta tergeýdiń tolyqtyǵyn jáne durystyǵyn qamtamasyz etý maqsatynda qajetti tergeý amaldary júrgizilip jatyr», - dedi departamentten.

Aıta keteıik, Qylmystyq kodekstiń 105-babynda jábirlenýshini qorqytý, oǵan qatygezdikpen qaraý nemese onyń adamı qadir-qasıetin únemi qorlaý arqyly adamdy ózin-ózi óltirýge deıin nemese ózin-ózi óltirýge barýǵa deıin jetkizý úsh jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanatyndyǵy kózdelgen.

Búgin QR Ekologııa, geologııa jáne tabıǵı resýrstar vıtse-mınıstri Ahmetjan Pirimqulov pen «ÓKM Operatory» JShS Basqarma tóraǵasy Medet Qumarǵalıevtyń ustalǵanyn jazǵan bolatynbyz.

Eske sala keteıik, 2022 jylǵy 11 qańtarda QR Parlamenti Májilisiniń otyrysynda sóılegen sózinde Memleket basshysy Qasym-Jomart Toqaev «ÓKM Operatory» JShS-niń kádege jaratý alymyn júrgizý jáne kádege jaratý alymyna ıelik etýin toqtatý týraly tapsyrma berdi.

Sonyń aıasynda 2022 jylǵy 18 qańtarda QR Úkimeti «QR Ekologııa, geologııa jáne tabıǵı resýrstar mınıstrligine vedomstvolyq baǵynysty uıymdardyń keıbir máseleleri týraly» qaýly qabyldady. Osyǵan baılanysty óndirýshilerdiń (ımporttaýshylardyń) keńeıtilgen mindettemeleriniń operatory bolyp memlekettik uıym retinde «Jasyl damý» aktsıonerlik qoǵamy aıqyndaldy.


Jańalyqtar

MURAǴAT