Náresteni bótelkemen tamaqtandyrady: elordalyq dárigerler kovıd ortalyǵyn kórsetti
2022 jylǵy 19 qańtar 23:44

Náresteni bótelkemen tamaqtandyrady: elordalyq dárigerler kovıd ortalyǵyn kórsetti

NUR-SULTAN. QazAqparat - Elordalyq juqpaly aýrýlar ortalyǵynyń medıtsına qyzmetkerleri naýqastardy emdeý barysynda túsirilgen vıdeolardy jarııalady, dep habarlaıdy QazAqparat elorda ákimdiginiń resmı saıtyna silteme jasap.

Kadrlarda túrli apparattardyń astynda jatqan balalardy baıqaýǵa bolady.

Sol sııaqty dárigerlerdiń arnaıy qorǵanys kostıýmderin kıip, náresteni qalaı tamaqtandyryp jatqanyn kórýge bolady. Náreste reanımatsııada jatqandyqtan («qyzyl aımaqta») oǵan tek aýrýhana dárigerleriniń kirýine ǵana ruqsat beriledi.

Nur-Sultanda sońǵy aılarda statsıonarda em qabyldap jatqan naýqastar sany 30 eseden astam ósti. Sonymen qatar, vırýs balalar arasynda da tez taralady. Osy sebepti reanımatsııaǵa túsetinder kórsetkishi artty.

Dárigerler kezekti ret vırýstyń qaýipti ekeni taǵy de eskertti.

«Qazir bizdiń aýrýhanada jańa týǵan náresteden 18 jasqa deıin 200-den astam naýqas jatyr. Sondyqtan Nur-Sultan qalasynyń turǵyndaryna adam kóp jınalatyn oryndarǵa barmaýǵa, jeke gıgıenany qatań saqtaýǵa shaqyramyn. Aýrý belgileri bilingen jaǵdaıda dárigerdiń kómegine júginý kerek. Medıtsınalyq kómek alǵannan keıin, qajet bolǵan jaǵdaıda úıde emdelý kerek. Ózińizdi qorǵańyz. Qazir oqýshylardy Pfizer preparatymen vaktsınalaý bastalǵanyn aıtqym keledi. Sondyqtan aýrýdyń aldyn alýdyń bir ǵana ádisi bar, ol vaktsınatsııa. Ekpe almaǵandardy vaktsınadan ótýge shaqyramyn. Revaktsınatsııadan ótý mańyzdy», - deıdi №3 kópbeıindi qalalyq balalar aýrýhanasynyń dárigeri, bólim meńgerýshisi Janar Sambetqyzy.

Sondaı-aq, kadrdan úlken kisilerdiń de emdelip jatqanyn baıqaýǵa bolady. Aýrýdyń aýyr aǵymy bar naýqastar tynys alý júıesiniń qosalqy apparattaryna qosylady. Dárigerler indettiń kúsheıý sebebin jańa jyldyq merekelermen jáne «omıkron» shtamynyń paıda bolýymen baılanystyryp otyr.

«Jańa jyldan keıin búkil el boıynsha koronavırýs ınfektsııasyn juqtyrǵandar sany kúrt ósti. Kún saıyn myńdaǵan adam jedel medıtsınalyq kómekke júginedi, júzdegen adam táýligine aýrýhanaǵa jatqyzylady. Bizdiń vaktsınatsııa ǵana pandemııadan qutqara alady!» - dedi joǵary sanatty dáriger-ırnfektsıonıst Sáýle Atyǵaeva.

Qalada ashylǵan 2 200 tósektiń 876-sy ǵana bos. Jasandy tynys alý apparatyna 17 patsıent qosylǵan. Sondaı-aq, KVI-men ambýlatorııalyq deńgeıde emdeletin turǵyndar bar, olardyń sany qala boıynsha 33 myńnan asady.



Jańalyqtar

MURAǴAT