Mádenıet jáne sport mınıstrligi Baqyt Sársekbaevtyń pikirine jaýap berdi
2022 jylǵy 17 qańtar 21:38

Mádenıet jáne sport mınıstrligi Baqyt Sársekbaevtyń pikirine jaýap berdi

NUR-SULTAN. QazAqparat – QR Mádenıet jáne sport mınıstrligi bokstan Olımpıada chempıony Baqyt Sársekbaevtyń Qazaqstan quramasynyń Tashkentte ótetin Azııa chempıonatyna qatyspaýyna qatysty aıtqan pikirine jaýap berdi, dep habarlaıdy QazAqparat tilshisi.

Buǵan deıin Baqyt Sársekbaev Instagram paraqshasynda jazba qaldyrǵan bolatyn.

«Sizder Parıj-2024 Olımpıadasynda Tokıo-2020-daǵydaı nátıjeni qalap otyrsyzdar ma? Sizder elimiz ben sportshylarymyzdy Azııa chempıonatyna jáne odan keıin Azııa oıyndaryna qatysýǵa laıyqsyz dep kemsitpeksizder me? Sporty mańyzy tómen match bolmaıdy!», - dep jazdy boksshy.

Osyǵan oraı QR Mádenıet jáne sport mınıstrligi boksshynyń pikirine jaýap berip, ulttyq quramanyń atalǵan jarystarǵa qatysýdan bas tartý sebebin túsindirdi.

«Bastapqyda Qazaqstan quramasy atalǵan jarysqa qatysýdy josparlaǵan edi. Alaıda, PTR-test tapsyrý barysynda Qazaqstannyń qyzdar ulttyq quramasy músheleriniń arasynda koronavırýspen aýyrǵandar sanynyń kóp bolýy josparymyzǵa túzetý engizdi. Alty sportshymyzdan PTR-testileýdiń oń nátıjesi shyǵýyna baılanysty sanıtarlyq-epıdemıologııalyq qyzmet jattyǵý bazasyn karantınge jabý týraly sheshim qabyldady», - dep túsindiredi QR MSM Sport jáne dene shynyqtyrý isteri komıteti tóraǵasynyń orynbasary Aıgúl Bektenova.

Onyń atap ótýinshe, ınfektsııanyń paıda bolýyna jáne taralýyna jol bermeý maqsatynda bokstan ulttyq quramanyń bas bapkeri aldaǵy Azııa chempıonatyna qatyspaý týraly sheshim qabyldaǵan.

«Oryn alǵan jaǵdaıda atalǵan is-shara qazaqstandyq sportshylar men olardyń bapkerleriniń densaýlyǵyn saqtaý maqsatynda qajet boldy. Buǵan qosa, tótenshe jaǵdaı rejıminiń engizilýine baılanysty bokstan erler quramasy Azııa chempıonatynda daıyndyqqa arnalǵan oqý-jattyǵý jıynyn ótkize almady. Sondyqtan bapkerler shtaby atalǵan birinshilikke qatyspaý týraly sheshim qabyldady», - dedi olú

Mınıstrlik ókiliniń sózine qaraǵanda, taıaý ýaqytta Qazaqstannyń qurama komandasy 2022 jyldyń maýsymyna josparlanyp otyrǵan Azııa boks konfederatsııasy uıymdastyratyn Erler men qyzdar arasynda bokstan Azııa chempıonatyna qatysý úshin belsendi daıyndyqty bastaıdy.


Jańalyqtar

MURAǴAT