+7 (701) 759 90 19
USD 424.99 EUR 504.21
RUB 5.81 CNY 65.66
Jańalyqtar

Qorǵanys mınıstrligi 2020 jylǵy qarashadaǵy Prezıdent tapsyrmalaryn júzege asyrý jaıyn qorytyndylady

2021 jylǵy 1 maýsym 11:40
Bólisińiz:
Qorǵanys mınıstrligi 2020 jylǵy qarashadaǵy Prezıdent tapsyrmalaryn júzege asyrý jaıyn qorytyndylady

NUR-SULTAN. QazAqparat - Elordada Qorǵanys mınıstrliginiń alqa otyrysy ótip, onda oqý jylynyń qorytyndysy shyǵaryldy, dep habarlaıdy QazAqparat vedomstvonyń baspasóz qyzmetine silteme jasap.

Bul otyrysqa qorǵanys vedomstvosynyń basshylyǵy, ásker túrleriniń bas qolbasshylary, óńirlik qolbasshylyqtar men ásker tekteriniń qolbasshylary qatysyp, barlyq garnızondar beınekonferentsııa baılanysy arqyly qosyldy.

El Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń 2020 jylǵy qarashadaǵy alqa otyrysynda bergen tapsyrmalaryn júzege asyrýdyń aralyq qorytyndylary shyǵaryldy.

Otyrys barysynda áskerlerdiń tynys-tirshiligine qatysty barlyq másele qarastyryldy. Eń aldymen, Qarýly kúshterdiń basty mindeti – jaýyngerlik ázirlikti qoldaý, jeke quramnyń jaýyngerlik mashyǵyn jáne basqarý organdarynyń úılesimdiligin arttyrý máseleleri oryndalǵany ataldy.

«Áskerlerdiń jaýyngerlik oqytý aıasynda jedel daıarlyqtyń qarqyny 16%-ǵa, al jaýyngerlik daıarlyq 5%-ǵa artty. Bul rette 19 500-ge jýyq is júzinde atys, jaýyngerlik mashınalardy júrgizý boıynsha 9 000 sabaq ótkizildi.

Áýe qorǵanysy kúshterinde jaýyngerlik oqý-jattyǵý ushýlary men áýe shabýylyna qarsy qorǵanys bólimsheleriniń oqý-jattyǵýy basty nazarda boldy. Qarýly kúshterdiń atalmysh ásker túrinde jaýyngerlik daıarlyqtyń jalpy sany 25%-ǵa artty.

Áskerı teńizshiler 17 ret teńizge shyǵyp, 2245 keme jattyǵýyn ótkizdi. Súńgýir bólimsheleri jalpy 112 saǵatyn sý astynda ótkizgen, 180 ret teńizge túsý tájirıbesin oryndady», delingen habarlamada.

Vedomstvonyń málimdeýinshe, barlyq jaýyngerlik daıarlyq is-sharalary qazirgi zamanǵy qarýly qaqtyǵystar tájirıbesin eskere otyryp uıymdastyrylady. Áskerlerdi oqytý men qoldanýda jańa tásilder belsendi túrde engizilip jatyr.

Sondaı-aq, eki jaqty taktıkalyq oqý-jattyǵýlardyń tájirıbesi keńinen qoldanylyp keledi.

Naýryz aıynda «Mátibulaq» polıgonynda Qarýly kúshter tarıhynda alǵash ret eki jaqty brıgadalyq taktıkalyq oqý-jattyǵý ótti. Onda mehanıkalandyrylǵan jáne shabýyldaý brıgadalary bir-birine qarsy turdy.

«Altyn jebe» keshendi tekserý barysynda qys mezgilinde shyǵysta jáne batys óńiriniń shóldi aımaqtarynda arnaıy operatsııalar kúshteri quralymdarynyń tájirıbelik is-qımyly pysyqtaldy. Budan ózge, alǵash ret Mańǵystaý oblysyndaǵy avtomobıl jolynyń áýeaılaǵyna Sý-27 joıǵyshy men S-295 áskerı-kólik ushaǵy qondy. Keıinnen bul ádisti oqý-jattyǵý barysynda jaýyngerlik tapsyrmalardy oryndaý úshin jeke quramdy jetkizý kezinde qoldandy.

«Qalqan-2021» birlesken jedel-taktıkalyq oqý-jattyǵý sheńberinde alǵash ret teńiz jaǵalaýynda mindetterdi oryndaǵan Arnaıy operatsııalar kúshteriniń toby quryldy. Bul oqý-jattyǵýǵa ushqyshsyz ushý apparattarynyń bólimsheleri keńinen jumyldyryldy. Sý asty jáne sý ústi tásilderin qoldaný arqyly júzgish jaýyngerlerdi teńizge túsirý oryndaldy. Ottegi jabdyǵyn qoldana otyryp, joǵary bıiktikterden desant túsirý, áýe arqyly syrtqy aspada utqyr tehnıkany tasymaldaý jáne shabýyldaý toptaryn tikushaqtardan túsirý iske asyryldy.

Teńiz jaıaý áskerleriniń shartty qarsylasty joıý boıynsha shekarashylarmen ózara is-qımyl máseleleri pysyqtaldy. Osy oraıda, «Saq qorǵany» tank bólimsheleriniń jańa is-qımyly synaldy.

«Armııa halyqaralyq oıyndarǵa daıyndalý barysynda áskerı qyzmetshiler kásibı sheberlikterin jetildirilýde. Qazaqstandyq jaýyngerler bıyl 11 konkýrsqa qatysýdy josparlap otyr. Onyń ishinde 2-ýi óz elimizde ótedi.

Áskerdi jańa tehnıkamen jaraqtaý úrdisi jalǵasýda. Áskerı synaqtardan sátti ótken, jańa «Býk» zenıttik-zymyran keshenderi men otandyq «Nur» radıolokatsııalyq stantsııalary kezekshilik atqarýda. Sonymen qosa, Sý-30SM joıǵyshtarynyń kezekti legi jetkizildi.

Otandyq qorǵanys ónerkásibi kesheni kásiporyndarynda áskerı tehnıkany kúrdeli jóndeý jáne jańartý iske asyrylýda», delingen habarlamaad.

Áskerı tehnıkany óz kúshimen qalpyna keltirý múmkindikteri jetildirilýde. Mamandandyrylǵan áskerı bólimder men brıgada bólimshelerinde 1200-den astam tehnıka aǵymdyq jáne orta jóndeýden ótkizildi. Almatyda brondy tank pen zymyran-artıllerııalyq qarý-jaraǵyn jóndeý boıynsha sońǵy úlgidegi tseh iske qosyldy.

Ǵylymı-óndiristik, utymdy jáne ónertapqysh jumystary jandandyryldy. Ulttyq qorǵanys ýnıversıteti ǵalymdarynyń qazaqstandyq kásiporynmen birlesip shyǵarǵan alǵashqy otandyq «Shaǵala» ushqyshsyz ushý apparaty synaqtan ótti.

Áskerlerde atys jáne arnaıy daıarlyqqa arnalǵan birqatar oqý quraldary ázirlendi. Osy qyzmettiń nátıjelerin uıymdastyrýdy, sondaı-aq yntalandyrýdy jáne praktıkada qoldanýdy kózdeıtin erejeni ázirleý týraly tapsyrmalar berildi.

Qarýly kúshterdiń qorǵanys-ónerkásip keshenimen ózara qarym-qatynasty retke keltirý jóninde sharalar qabyldandy. Qorǵanys mınıstrligi áskerdiń ǵylymı-tehnıkalyq áleýeti men qajettilikterin eskere otyryp, otandyq kásiporyndarda asa mańyzdy áskerı ónim shyǵarý týraly negizgi 9 baǵytty usyndy.

Áskerı ınfraqurylymdy jetildirý sheńberinde tez salynatyn qurylystan obektiler salý tájirıbesin keńeıtý boıynsha jumys júrgizilýde. Bul bıýdjet qarajatyn únemdeýge jáne ǵımarattar salý merzimin qysqartýǵa múmkindik beredi.

«Áskerı tártip jáne áskerı qyzmet qaýipsizdiginiń máseleleri jeke qaraldy. Quqyq tártibin saqtaý úshin komandırlerdiń jeke jaýapkershiligin kúsheıtýge arnalǵan osyǵan deıin belgilengen baǵyt aıasynda birneshe laýazymdy tulǵa jumysty tıisinshe uıymdastyrmaǵany úshin atqaratyn qyzmetinen shettetildi.

Sybaılas jemqorlyqqa qarsy is-qımyl ózekti másele kúıinde qalyp otyr. Sonymen qatar, qabyldanǵan sharalardyń arqasynda ótken kezeńde sybaılas jemqorlyqpen quqyq buzýshylyqtar sanynyń tómendeýi baıqalady. Jemqorlyq júıeli emes, onyń bıýdjet qarajatyn aýqymdy qymqyrýmen de baılanysy joq, bul jemqorlyq túrleri turmystyq, tulǵaaralyq sıpatqa ıe.

Atap aıtqanda, baıandamada qıyn jaǵdaıǵa tap bolǵan áriptesterine, onyń ishinde balalaryn emdeýge kómektesý úshin jalaqy men syılyqaqylardan aqsha jınaý jalǵasýda. Bul nıettiń jaqsy oıdan týǵanyna qaramastan, atalmysh faktilerge jol berýge bolmaıdy jáne ol zańsyz áreketter retinde qýdalanady. Osyǵan baılanysty, bundaı is-sharalardy júzege asyrýdyń zańdy tetigin pysyqtaý qajet.

Sybaılas jemqorlyq táýekelderin joıýǵa qatysty jumysty jalǵastyrý tapsyryldy. Onyń negizgi baǵyttary – kadrlardy irikteý jáne zerdeleý, ómirdiń barlyq salalaryndaǵy ashyqtyqty qamtamasyz etý, kórsetiletin qyzmetterdi tsıfrlandyrý, ıaǵnı adamı faktordy barynsha azaıtý, sondaı-aq basshylar tarapynan baǵynystylardyń zańdy saqtaýdaǵy jaýapkershiliktiń bolýy», delingen habarlamada.

Mınıstrliktegi áleýmettik qamsyzdandyrýǵa máselesi aıtyldy. Qorǵanys vedomstvosynyń bastamasymen 2021 jyldan bastap áskerı qyzmetshilerdiń azyq-túlik úlesiniń quny orta eseppen 40 paıyzǵa artty. Laýazymdyq jalaqylar ósti.

Jabyq áskerı qalashyqtarda turatyn burynǵy áskerı qyzmetshilerdi turǵyn úımen qamtamasyz etý máselesi josparly túrde sheshilýde. Árbir garnızon úshin elektrondyq formatta júrgiziletin turǵyn úı alýǵa kezektilik retke keltirildi. Jeke quramnyń áleýmettik ahýalyn jaqsartý jónindegi jumysty jalǵastyrý josparda bar.

2020 jyldaǵydaı, Qarýly kúshter koronavırýs ınfektsııanyń taralýyna qarsy kúreste barynsha úles qosýda. Elordalyq jáne Almaty áskerı gospıtaldary COVID-statsıonarlarǵa retinde jabdyqtaldy. Basqa da áskerı emdeý mekemeleri men dárigerlik-meıirbıkeler brıgadalary azamattyq densaýlyq saqtaýǵa kómektesýge ázir. Birqatar garnızondarda ákimdikterdiń suraýy boıynsha bólimsheler áleýmettik mańyzy bar obektilerdi dezınfektsııalaýǵa tartyldy.

Ujymdyq ımmýnıtetti qalyptastyrý sheńberinde Qarýly kúshterdiń jeke quramy vaktsınatsııalaýǵa belsendi qatysty. Áskerı qyzmetshiler men azamattyq personaldyń 94%-dan astamy ekpe aldy. Tek medıtsınalyq qarsy kórsetilimderi barlarǵa ekpe salynbady.

«Alqa otyrysynyń sońynda aldaǵy jazǵy oqý kezeńi qarqyndy jáne mazmundy bolatyny atap ótildi. Barlyq salada kóptegen mańyzdy sharalardy oryndaý qajet, al olardyń qorytyndysy jyl sońynda shyǵarylady.

Memleket basshysynyń Qorǵanys mınıstrligi basqa memlekettik organdarmen birlesip ázirlegen Qarýly kúshterdi, basqa da áskerler men áskerı quralymdardy damytýdyń 2030 jylǵa deıingi el áskerin jetildirýdiń basty baǵyttaryn aıqyndaıtyn tujyrymdamasyn bekitýi mańyzdy oqıǵa bolýǵa tıis», delingen habarlamada.


Bizdiń kanalymyzǵa jazylyńyz:

Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059
REDAKTOR
Janat Qapalbaeva
Janat Qapalbaeva
954-059

MURAǴAT