Qazaqstandyq jas tennısshiler halyqaralyq jarystarda jeńimpaz atandy
2022 jylǵy 22 mamyr 19:46

Qazaqstandyq jas tennısshiler halyqaralyq jarystarda jeńimpaz atandy

NUR-SULTAN. QazAqparat - Qazaqstandyq jas tennısshiler birneshe halyqaralyq týrnırde jeńimpaz atandy, dep habarlaıdy QazAqparat tilshisi.

Qazaqstan tennıs federatsııasy málim etkenindeı, Tegeran qalasynda 18 jasqa deıingiler arasynda úshinshi sanattaǵy ITF jarysynda aqtaýlyq Danıal Rahmatýllaev jekeleı synda úzdik shyqty.

Ol fınalda dodanyń 6-raketkasy, marokkolyq Ilıas Fahımdi 7:5, 6:1 esebimen tize búktirdi.

Danıal juptyq synda reseılik Amırhamza Nasrıdınovpen birge fınalǵa deıin jetip, týnıstik Raen Haması - polıak Goran Shkolaǵa ese jiberdi - 3:6, 4:6.

Túrkııada 14 jasqa deıingiler arasynda úshinshi sanattaǵy Tennis Europe týrnırinde Aqtóbe tennıs mektebiniń túlegi Eva Korysheva óziniń iri halyqaralyq jarystaǵy alǵashqy tıtýlyna qol jetkizdi. Eva sońǵy básekede týnıstik Imıs Homaspen oınady. Qazaqstandyq tennısshi 5:7, 6:0, 6:1 esebimen jeńiske jetti.

Slovenııada 14 jasqa deıingiler arasynda ekinshi sanattaǵy osyndaı jarysta Damır Jalǵasbaı juptyq synda shvetsııalyq Vıktor Raıdenmen birge chempıondyq tuǵyrǵa kóterildi. Olar fınalda aýstrııalyqtar Tılo Berman - Florıan Tsımmerdi jeńdi - 6:0, 7:6 (7:3).

Jekeleı synda jartylaı fınalǵa deıin jetken Damır aýstrııalyq T. Bermanǵa jol berdi - 4:6, 0:6.

Slovenııada taǵy bir qazaqstandyq Sofıa Isakova Belarýs ókili Aleksandra Býshenkomen birge fınalıst atandy. Tıtýldyq básekede dodanyń birinshi raketkalary, reseılikter Alıa Sınıtsa - Denesa Soldakovadan aılasyn asyra almady - 5:7, 3:6.

Eske sala keteıik, budan buryn qazaqstandyq jas tennısshilerdiń Albanııadaǵy týrnırdiń chempıony atanǵanyn jazǵan bolatynbyz.


Uqsas jańalyqtar

Jańalyqtar

MURAǴAT