Qazaqstanda jyl basynan beri 92 balany kólik qaǵyp ketken
2022 jylǵy 23 mamyr 12:10

Qazaqstanda jyl basynan beri 92 balany kólik qaǵyp ketken

NUR-SULTAN. QazAqparat – Elimizde árbir besinshi jol-kólik oqıǵasynan kámeletke tolmaǵan bala zardap shegedi. Bul týraly QR ІІM Ákimshilik polıtsııa komıteti tóraǵasynyń orynbasary Jandos Muratálıev málim etti , dep habarlaıdy QazAqparat tilshisi.

«Jyl saıyn jol apatynan 200-ge jýyq bala kóz jumyp, 3 myńnan astamy ártúrli dene jaraqatyn alady. Bul - memleket úshin orny tolmas shyǵyn jáne qoǵamnyń demografııalyq rezervine nuqsan keltiredi. Ótken jyldan bastap mektep oqýshylaryna jolda qaýipsiz júrip-turýdy túsindirý sabaqtary ótkizilgen joq. Osylaısha balalardyń jolda jaraqattanýyna qarsy sharalar sany azaıdy. Bul qazirdiń ózinde jalpy jaǵdaıǵa keri áser etip otyr», - dedi Jandos Muratálıev vedomstvoda ótken baspasóz máslıhatynda.

Onyń aıtýynsha, jol-kólik oqıǵasynan zardap shegetin balalardyń deni kólik ishinde bolady.

«Kóp jaǵdaıda eresekter kólikte tasymaldaý erejesin saqtamaı, ıaǵnı balalardy arnaıy quralsyz nemese belbeýmen bekitpeı tasymaldaıdy. Sonymen qatar, jaıaý júrginshilerdiń kinásinen bolatyn jol-kólik oqıǵalarynyń negizgi sebebi - jol belgisi joq jerden kesip ótý nemese baǵdarshamnyń qyzyl túsi janyp turǵanda ótip ketedi. Keıde jaqyndap qalǵan kóliktiń aldynan kesip ótip jatady. Jyl basynan beri el aýmaǵynda 92 kámeletke tolmaǵan jaıaý júrginshini qaǵyp ketý deregi tirkeldi. Onyń ishinde 5 bala qaza taýyp, 97-si jaraqat alǵan», - deıdi ol.


Jańalyqtar

MURAǴAT