Elordada alǵash ret Kúı jármeńkesi uıymdastyryldy
2022 jylǵy 23 mamyr 15:02

Elordada alǵash ret Kúı jármeńkesi uıymdastyryldy

NUR-SULTAN. QazAqparat – Elordada alǵash ret Kúı jármeńkesi uıymdastyryldy. Mádenı-rýhanı is-shara Dına Nurpeıisovanyń eskertkishine gúl shoqtaryn qoıýmen bastaldy, dep habarlaıdy QazAqparat tilshisi.

Aldymen «Altyn dombyra» balalar mektebiniń shákirtteri men qaladaǵy №37 mektep-lıtseıdiń oqýshylary óner kórsetti.

QR eńbek sińirgen qaıratkerleri, kásibı kúıshi-dombyrashylar Turar Álipbaev pen Anar Muzdahanova birneshe kúı tartyp, kórermenderdiń qoshemetine bólendi.

Jınalǵandar aldynda «Kúı anasy» respýblıkalyq qorynyń jetekshisi Tólegen Qýanyshev pen Nur-Sultan qalasy qoǵamdyq keńesiniń tóraǵasy Zýlfýhar Gaıpov sóz sóıledi.

«Ótken jyly Ulttyq dombyra kúni qarsańynda kúı anasy atanǵan Dına Nurpeıisovanyń eskertkishi ashylyp edi. Saltanatty jıynda azamattar «Osy jerdi bolashaqta óner ortalyǵyna aınaldyryp, týrıstik klaster uıymdastyraıyq» degen pikirlerin bildirgen. Bizder qala ákimi Altaı Kólginovke usynys jasap, sonyń nátıjesinde osy alań bolashaqta qazaq halqynyń kúıshileri men kúıshi-kompozıtorlar alleıasy atanatyn boldy. Halyqqa, sonyń ishinde jastarǵa tól ónerimiz – kúıdi dáripteý men nasıhattaý maqsatynda mádenı is-sharalardy usynǵan bolatyn. Mine, búgin sol usynysty júzege asyrýdyń sáti túsip tur», - dedi T.Qýanyshev.

Baǵdarlamaǵa sáıkes Kúı jármeńkesinde jurtshylyq ishinen óz ónerin kórsetemin degen adamdar ortaǵa shaqyryldy.

QR eńbek sińirgen qaıratkerleri, kúıshi, ustazdar Aıtjan Toqtaǵan men Orynbaı Dúısen qazylyq jasady. Saıysqa onnan astam úmitker qatysty. Sonyń ishinde Nargız Qasymova jeńimpaz atanyp, úkili dombyraǵa ıe boldy. Sondaı-aq «Kúı anasy» respýblıkalyq qory qalalyq zııatkerlik mektep oqýshylaryna 10 dombyrany syıǵa tartty.

Osy kúni qoǵam jáne óner qaıratkerleri eskertkish mańyna 15-ke jýyq qaraǵaı aǵashtaryn otyrǵyzdy.

Kúı jármeńkesin Nur-Sultan qalalyq qoǵamdyq keńesi, qalalyq jastar saıasaty basqarmasy jáne «Kúı anasy» respýblıkalyq qory uıymdastyrdy.


Jańalyqtar

MURAǴAT