Elimizde 4 myńnan astam lıfti jóndeýdi nemese aýystyrýdy qajet etedi
2022 jylǵy 19 mamyr 13:08

Elimizde 4 myńnan astam lıfti jóndeýdi nemese aýystyrýdy qajet etedi

NUR-SULTAN. QazAqparat - Senator Rysqalı Ábdikerov Premer-Mınıstr Álıhan Smaıylovtyń atyna joldaǵan depýtattyq saýalynda lıftilerdiń nashar jaǵdaıyna jáne olarǵa qyzmet kórsetý deńgeıine qatysty problemalardy atap ótti, dep habarlaıdy QazAqparat tilshisi.

Depýtat 2012 jyly lıft salasyn lıtsenzııalaý alynyp tastalǵanyn aıtty. Nátıjesinde, jaýapkershiligi tómen kompanııalar paıda boldy, apatty jaǵdaılardyń saldarynan adamdar jaraqat alyp, keıbiri tipti mert boldy.

«Qazaqstan Respýblıkasy Indýstrııa jáne ınfraqurylymdyq damý mınıstrligi men Qazaqstan Lıftshileri ulttyq qaýymdastyǵynyń málimetterine súıensek, 2018-2022 jyldar aralyǵynda elimizde lıft aqaýynan 13 tótenshe jaǵdaı tirkelip, onyń 8-i qaıǵyly oqıǵamen aıaqtalǵan. Qazirgi kezde elimizdegi kópqabatty turǵyn úılerde shamamen 30 myńnan astam lıft bolsa, sonyń 4 myńnan astamy jóndeýdi nemese aýystyrýdy qajet etedi. Ásirese, Pavlodar, Qaraǵandy, Shyǵys Qazaqstan, Batys Qazaqstan, Aqtóbe oblystaryndaǵy turǵyn úılerdiń lıftileri ábden tozǵan. Sondyqtan bul másele jurtshylyqty qatty tolǵandyrady», - dedi senator palatanyń jalpy otyrysynda.

R.Ábdikerov sonymen qatar otandyq lıft jasaýshylardy qoldaýdy kúsheıtýdiń mańyzdylyǵyn atap ótti.

Resmı derekter boıynsha, jyl saıyn Qazaqstanǵa 5 myńnan astam lıft ákelinedi, al otandyq kompanııalar bul suranystyń tek 21%-dan astamyn ǵana qanaǵattandyra alady.

«Jergilikti ákimdikter bul salany damytýǵa qoldaý kórsete almaı otyrǵanyn da atap ótken jón. Memleket basshysy 2020 jylǵy Qazaqstan halqyna Joldaýynda: «Kásipkerlikke qoldaý kórsetkende orta bızneske de erekshe nazar aýdarý kerek» dep atap kórsetken bolatyn. Sondyqtan, aldymen otandyq óndiristi damytýǵa basymdyq bere otyryp, sonyń ishinde lıftilerdi montajdaý jáne oǵan qyzmet kórsetý jumystarynyń tıimdiligine qol jetkizý qajet. Qoryta kele, qazirgi kezde qabyldanyp jatqan sharalar lıft sharýashylyǵyn jańǵyrtý boıynsha tıisti nátıje bermeı otyr», - dedi senator Rysqalı Ábdikerov.

Senator osyǵan baılanysty salany qoldaýdy kúsheıtýdi, apatty lıftilerdi aýystyrýǵa nesıe bólýdi, ulttyq standart talaptarynyń saqtalýyn qatańdatýdy jáne olarǵa sáıkes kelmegen jaǵdaıda ákimdikterdiń osyndaı lıft kompanııalaryna aıyppul salýyna ruqsat berýdi, sondaı-aq kúmándi lıftilerdi jetkizýdi shekteý tetigin ázirleýdi usyndy.

Budan buryn habarlanǵadaı, Senattyń jalpy otyrysynda depýtat Dúısenǵazy Mýsın «Qazsýshar» kompanııasynyń qyzmetin synǵa aldy.



Avtor:
Tilshi

Jańalyqtar

MURAǴAT