Dáriger: Omıkron shtamynyń basty belgileri – býyn men bulshyqettiń qaqsap aýyrýy
2022 jylǵy 17 qańtar 18:49

Dáriger: Omıkron shtamynyń basty belgileri – býyn men bulshyqettiń qaqsap aýyrýy

NUR-SULTAN. QazAqparat – «Januıa» otbasylyq ambýlatorııa dırektorynyń orynbasary Zamıra Borlyqbaeva eldegi epıdemıologııalyq ahýal týraly pikir bildirdi, dep habarlaıdy QazAqparat tilshisi.

«Qazirgi tańda búkil Qazaqstan boıynsha korronavırýs aýrýynyń órship turǵanyn baıqaýǵa bolady. BAQ nemese basqa derekkózderdi bylaı qoıǵanda, muny ár adam ózinen de, áriptesteri men jaqyn týystarynyń aýyrǵanynan da baıqap jatqan shyǵar. Densaýlyq saqtaý qyzmetkerlerine de úlken júkteme túsip jatyr, ambýlatorııalyq, statsıonarlyq deńgeılerdiń bárinde aýrýshańdyq qaıta órshigenin kórýge bolady», - dedi dáriger QazAqparat tilshisine bergen suhbatynda.

Mamannyń aıtýynsha, bul aýrýshańdyqtyń artqanyn «Omıkron» shtamymen nemese basqa da aldyńǵy shtamdarmen baılanystyrýǵa bolady.

«Shtamm túri men naýqastar sanyn epıdemıologtar molekýlıarlyq deńgeıde ǵana anyqtaı alady. Al biz úshin qaı shtamm bolsa da, bári koronavırýstyń ishindegi túrler bolyp sanalady, olar PTR taldaýy arqyly ǵana dáleldenedi. Búkil álemge taralǵan Omıkron shtamynyń basty ereksheligi – onyń asa jupaly bolýy dep bilemiz. Sol úshin jańa jyldan keıin koronavırýstyń tez taralyp ketkenin Omıkron shtamymen baılanystyrýǵa bolady», - deıdi Z. Borlyqbaeva.

Koronavırýstyń qaı shtamy bolsa da, onyń aldyn alý men saqtanýdyń basty qarýy – vaktsınalaý bolyp otyr.

«Osy vaktsınany qaıta-qaıta aıta beresizder deýi múmkin, búkil medıtsına ujymy ony qaıtalaýdan esh sharshamaıdy. Óıtkeni, aýrýdyń aldyn alýdyń joly – ujymdyq ımmýnıtet qalyptastyrý, ol úshin vaktsına alý kerek. Vaktsına alǵandardyń da aýyryp jatqany ras. ıAǵnı, o basta aıtylǵandaı, vaktsına aýrýdan 100 paıyz qorǵaı almaıdy. Degenmen, vaktsına alǵandar sany artpaı, ujymdyq ımmýnıtet qalyptastpaı, jańa shtammdar tarala beredi. Sol úshin de vırýstyń aldyn alýdyń basty joly – tek qana ekpe alý», - dep túsindirdi dáriger.

Al jalpy koronavırýs úshin maska taǵyp júrý, qoldy taza ustaý, halyq kóp jınalǵan oryndarǵa, saýda oryndaryna barmaý, qonaq shaqyrmaý sekildi eki jyldan beri aıtyp jatqan sharalar – qaı shtamm bolsa da ózekti bolyp qala beredi.

«ıAǵnı barlyq saqtaný joldary bir – oqshaýlaný men sanıtarlyq-epıdemıologııalyq normalardy saqtaý arqyly vırýstyń taralýyn toqtata alamyz. Sondaı-aq, Omıkron shtamynyń basqalardan kóbirek baıqalǵan belgisi – býyn, bulshyqet, súıekterdiń qaqsap aýyrýy. ıAǵnı, dene qyzýy bolmaýy da múmkin, biraq basty sımptomdardyń biri retinde býyn, súıek, deneniń qaqsap aýyrýyn, aıqyn álsizdikti jáne qurǵaq jóteldi erekshe aıtýǵa bolady. Mobıldi toptar men fıltr kabınettegi naýqastardan baıqalǵan basty belgiler osyndaı. Omıkron shtamy jeńil ótedi degen sóz de bar. Árıne, aýyr jaǵdaılar da bar, ınfektsııalyq statsıonarlar qaıtadan jańa bólimshelerin, jańa tósek-oryndardy ashyp jatyr. Onda da naýqastar sany artyp otyr. Degenmen, naýqastardyń basym bóligi ambýlatorlyq em alatynyn, bir aptadan keıin jaǵdaılary birtindep jaqsara túskenin baıqadyq», - dedi Z. Borlyqbaeva.


Jańalyqtar

MURAǴAT