BQO-nyń úsh aýdanynda toqtap qalǵan sport kesheniniń qurylysy qaıta jandanady
2022 jylǵy 21 mamyr 23:35

BQO-nyń úsh aýdanynda toqtap qalǵan sport kesheniniń qurylysy qaıta jandanady

ORAL. QazAqparat – Batys Qazaqstan oblysynda úsh dene shynyqtyrý-saýyqtyrý kesheni qurylysyn qaıta bastaý josparlanyp otyr, dep habarlaıdy QazAqparat tilshisi.

BQO dene shynyqtyrý jáne sport basqarmasynyń basshysy Qaımen Esendııarovtyń aıtýynsha, 2020 jyly «QPO b.v.» kompanııasy qarjysy esebinen Aqjaıyq, Kaztalov jáne Tasqala aýdanynda keshen qurylysy bastalǵan edi.

Alaıda 2021 jyly qurylys materıaldarynyń qymbattaýyna jáne basqa sebepterge baılanysty jumys toqtap qaldy.

Basqarma basshysynyń sózine qaraǵanda, qazirgi kezde «QPO b.v.» kompanııasy jobalarǵa túzetý engizýde. Túzetý jumystary bitkennen keıin merdigerdi anyqtaý boıynsha konkýrstyq rásimder bastalady.

Sonymen qatar Aqjaıyq aýdanynyń Taıpaq jáne Báıterektiń Darııan aýylynda dene shynyqtyrý-sport keshenderiniń qurylysy bastalmaqshy. Taıpaq aýylyndaǵy keshen boıynsha «QPO b.v.» kompanııasy konkýrstyq rásimderdi júrgizýde. Merdiger anyqtalǵannan keıin qurylys bastaý alady. Darııandaǵy keshenge qatysty jobalyq-smetalyq qujattama memlekettik saraptamadan ótkizilýde.

«Memleket basshysynyń sporttyq ınfraqurylymdy nyǵaıtý jónindegi tapsyrmalaryn oryndaý, «100 dene shynyqtyrý-saýyqtyrý» kesheni jobasyn júzege asyrý maqsatynda ótken jyly «QPO b.v.» kompanııasynyń qarjysyna oblysta 6 dene shynyqtyrý-saýyqtyrý kesheni, jeke kásipkerlerdiń esebinen 2 sporttyq keshen (Omega Sports, dzıýdo ortalyǵy) jáne basqa nysandar paıdalanýǵa berilgen edi. Osy baǵyttaǵy jumystar aldaǵy ýaqytta da jalǵasady», dedi QazAqparat tilshisine Q.Esendııarov.

Qazirgi tańda óńirde 1 757 sporttyq nysan jumys jasaıdy. Kúni búgin 232 860 adam nemese oblys turǵyndarynyń 35 paıyzy sportpen júıeli túrde shuǵyldanady. Bul kórsetkishti jyl sońyna deıin 36 paıyzǵa jetkizý kózdelýde.

Eske sala keteıik, budan buryn Oraldaǵy «Jastar» stadıonynyń senimgerlik basqarýǵa beriletinin jazǵan bolatynbyz.



Uqsas jańalyqtar

Jańalyqtar

MURAǴAT