BQO-da koronavırýs juqtyrǵan 270-ten astam naýqas statsıonarda jatyr
2022 jylǵy 26 qańtar 13:40

BQO-da koronavırýs juqtyrǵan 270-ten astam naýqas statsıonarda jatyr

ORAL. QazAqparat – Batys Qazaqstan oblysynda 273 naýqas 729 tósektik 12 ınfektsııalyq statsıonarda em alyp jatyr, dep habarlaıdy QazAqparat tilshisi.

BQO Densaýlyq saqtaý basqarmasynan málim etkenindeı, statsıonarlar 37,4 paıyzǵa tolǵan.

Sonyń ishinde Oral qalasynda 556 tósektik 6 aýrýhanada 260 adam emdelýde.

Jansaqtaý bólimshesinde jatqan 15 naýqastyń jeteýi ınvazıvti emes jasandy tynys alý apparatyna, segizi ottegi kontsentratoryna qosylǵan.

Óńirde 2005 rezervtik (1130-y ınfektsııalyq, 875-i karantındik) tósek-oryn ázirlendi.

Oblys boıynsha pandemııa bastalǵannan beri 44 828, sonyń ishinde bıyl 4758 adam koronavırýs juqtyrdy. Sońǵy táýlikte 420 adamnan indet tabyldy.

Basqarmadan túsken málimetke qaraǵanda, 264 252 adam (egilýge tıisti turǵyndardyń 63,8 paıyzy) vaktsınanyń birinshi, 248 044-i (59,9 paıyzy) ekinshi komponentin saldyrdy.

Sondaı-aq 36 427-si revaktsınatsııadan ótti. 7955 adam Pfizer vaktsınasyn qabyldasa, sonyń 4108-i – jasóspirimder, 282-si – júkti, 3565-i – bala emizetin áıelder.

Eske sala keteıik, budan buryn Batys Qazaqstan oblysynda 310 baladan koronavırýs anyqtalǵanyn jazǵan bolatynbyz.


Jańalyqtar

MURAǴAT