Birtanov isi: Sotqa 141 tom materıal túsken
2022 jylǵy 26 qańtar 19:29

Birtanov isi: Sotqa 141 tom materıal túsken

NUR-SULTAN. QazAqparat – Nur-Sultan qalasy Saryarqa aýdandyq №2 sotynda burynǵy Densaýlyq saqtaý mınıstri Eljan Birtanovtyń isi boıynsha alǵashqy aldyn ala sot tyńdaýy ótti, dep habarlaıdy.

Aldyn ala tyńdaý barysynda qorǵaýshy Serik Saǵalıev Eljan Birtanovtyń ózine taǵylǵan aıyptardy moıyndamaıtynyn aıtty.

«Bizdiń qorǵaýymyzdaǵy E.Birtanov sotqa deıingi tergeý barysynda da taǵylǵan aıypty moıyndaǵan joq qazir de moıyndamaıdy», - dedi ol.

Nur-Sultan qalasy Saryarqa aýdandyq №2 sotynyń sýdıasy Ibragım Álkenov aıyptalýshy taraptan is materıaldaryna qatysty qandaı da bir qarsylyq, shaǵymdary bar-joǵyn surady.

Eks-mınıstr Eljan Birtanov pen onyń orynbasary bolǵan Oljas Ábishevtiń advokattary aıyptaý materıalymen tanysyp úlgermegenin aıtyp, qujattarmen tolyq tanysyp shyǵýǵa múmkindik berýdi surady.

Al kúdikti Oljas Ábishevtiń ózi memlekettik is materıalynyń naqty kólemi týraly búgin ǵana shynaıy aqparat alǵanyn aıtty.

«Búgin men biletin 133 tomnan basqa taǵy 4 tom bar ekenin birinshi ret estip turmyn. Bul men úshin jańa málimet. Resmı túrde málimdegim keledi, nege tergeý organy bul tomdardy jasyryp qalǵan? Maqsattary qandaı bolǵan? 133 tom bar dep júrgenbiz. Búgin taǵy 4 tom bar dep otyr. Sonda barlyǵy 137 tom bolyp shyǵady. Bul 4 tom týraly bizge nege eshkim aıtqan joq?», - dedi Oljas Ábishev.

Sýdıa Ibragım Álkenov bul suraqty erteńgi tyńdaýda protsessýaldyq prokýrorǵa qoıýǵa keńes berdi. Onyń aıtýyna qaraǵanda, E.Birtanovtyń isi boıynsha sotqa 141 tom materıal túsken.

«Sotqa aıyptaý aktilerin qosqanda 141 tom materıal kelip tústi», - dedi sýdıa.

Atalmysh is boıynsha aldyn ala tyńdaý erteń, ıaǵnı, 27 qańtar kúni saǵat 15.00-de jalǵasatyn boldy.

Aıta keteıik, 17 qańtarda burynǵy Densaýlyq saqtaý mınıstri Eljan Birtanovtyń ústinen qozǵalǵan qylmystyq is sotqa túskeni týraly habar taraǵan bolatyn.

Al 20 qańtarda atalmysh is boıynsha aldyn ala tyńdaý 26 qańtarda ótetini belgili boldy.

Eljan Birtanov 2020 jyldyń 3 qarashasynda bıýdjet qarajatyn ysyrap etti degen kúdikpen qamaýǵa alynǵan bolatyn.



Jańalyqtar

MURAǴAT