Baıqońyr qalasynda terrorıstik qaýiptiliktiń «kók» deńgeıi engizildi
2022 jylǵy 19 qańtar 21:58

Baıqońyr qalasynda terrorıstik qaýiptiliktiń «kók» deńgeıi engizildi

BAIQOŃYR. QazAqparat - Baıqońyr qalasynda terrorıstik qaýiptiliktiń joǵary «kók» deńgeıi engizildi, dep habarlaıdy QazAqparat tilshisi qala ákimshiligi saıtyna silteme jasap.

Qala basshylyǵynyń málimetinshe, quqyq qorǵaý organdarynan terrorıstik akti qaýpi jáne onyń jasalýyna qarsy is-qımyl uıymdastyrý týraly aqparat túsken. Osyǵan baılanysty Baıqońyr qalasynyń terrorızmge qarsy komıssııasynyń tóraǵasy, ákimdik basshysy Konstantın Býsygın Baıqońyr aýmaǵynda terrorıstik qaýiptiliktiń joǵary «kók» deńgeıin engizý týraly sheshim qabyldady. Ol 2022 jylǵy 19 qańtar saǵat 12.00-den 3 aqpan saǵat 12.00-ge deıin belgilengen. Atalǵan sheshim 15 táýlik aralyǵynda óz kúshinde bolady.

Quqyq qorǵaý organdary Baıqońyr aýmaǵynda azamattar men memleket qaýipsizdigin qamtamasyz etýge baǵyttalǵan qosymsha sharalar qabyldaýda. Quqyq qorǵaý organdaryna kómek kórsete otyryp, olardyń talabyna túsinikpen jáne shydammen qaraý suralady.

Eske salsaq, Baıqońyrda arandatýshylyq sıpattaǵy jalǵan aqparat taratqan adam anyqtalǵanyn buǵan deıin jazǵan bolatynbyz.


Jańalyqtar

MURAǴAT