Batys Qazaqstanda ınfektsııalyq statsıonarda jatqandar sany 150-den asty
2022 jylǵy 17 qańtar 15:16

Batys Qazaqstanda ınfektsııalyq statsıonarda jatqandar sany 150-den asty

ORAL. QazAqparat – Batys Qazaqstan oblysynda 504 tósektik 8 ınfektsııalyq statsıonarda 154 naýqas emdelip jatyr, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, óńirde koronavırýs juqtyrǵandar sany kúrt kóbeıip, aýrýhanalar 30,2 paıyzǵa toldy.

Aýyrǵandardyń bári de Oral qalasyndaǵy 4 statsıonarda. Sonyń ishinde tórteýiniń jaǵdaıy aýyr. Olardyń bireýi ınvazıvti jasandy tynys alý apparatyna, ekeýi ınvazıvti emes osyndaı qurylǵyǵa, taǵy bireýi ottegi kontsentratoryna qosylǵan.

Oblysta 2184 (1309-y ınfektsııalyq, 875 karantındik) rezervtik tósek-oryn ázirlendi.

Ótken jyly 684 adam koronavırýstan kóz jumsa, bıyl 4 naýqas qaıtys boldy.

Jyl basynan beri 1348 adamnan indet tabylsa, sonyń 35-i – balalar.

Basqarmadan túsken málimetke qaraǵanda, vaktsınatsııa bastalǵannan beri 259 756 adam (egilýge jatatyn turǵyndardyń 62,6 paıyzy) birinshi, 245 777-si (59,3 paıyzy) ekinshi komponentpen egildi.

Qazirgi kezde óńirde 60 878 doza birinshi, 80 513 doza ekinshi komponent bar.

Revaktsınatsııadan 26 347 adam ótti. Pfizer vaktsınasyn 6564 adam saldyrsa, sonyń 233-i – júkti, 2890-y – bala emizetin áıelder, 3441-i – jasóspirimder.

Eske sala keteıik, budan buryn Batys Qazaqstannyń «qyzyl» aımaqqa enýine baılanysty qatań shekteý sharalary engiziletinin, óńirde 600-ge jýyq adamnan koronavırýs tabylǵanyn jazǵan bolatynbyz.


Jańalyqtar

MURAǴAT