Astana LRT: 6 mlrd teńgege jýyq qarjyny talan-tarajǵa salǵandar 7-10 jylǵa sottaldy
2021 jylǵy 28 mamyr 17:44

Astana LRT: 6 mlrd teńgege jýyq qarjyny talan-tarajǵa salǵandar 7-10 jylǵa sottaldy

NUR-SULTAN. QazAqparat – Búgin Nur-Sultan qalasynyń qylmystyq ister boıynsha mamandandyrylǵan aýdanaralyq sotynda Astana LRT isinde aıypty dep tanylǵan laýazymdy tulǵalarǵa úkim shyqty, dep habarlaıdy QazAqparat.

Sot sheshimi qalalyq sottyń resmı saıtynda jarııalandy.

Búgingi sotta Astana LRT jobasyn iske asyrý kezinde 5,8 mlrd teńgeni talan-tarajǵa saldy degen kúdikpen birneshe laýazymdy tulǵanyń isi qaraldy.

Olar - qalalyq jolaýshylar kóligi jáne avtomobıl joldary basqarmasynyń eks basshysy R.M. Amanjolov, «MG-Pro» dırektory D.S: Ábdihamıtov, «Nur Trade Astana» JShS dırektory Ý.I. Achılov, «Geobýr» ǵylymı-óndiristik fırmasynyń dırektory T.N. Qasabaev, qalalyq qarjy basqarmasynyń burynǵy basshysy J.G. Nurpeıisov, «Astana Innoveıshn» AQ basqarma tóraǵasy T.S. Áshim, «Rimteks» JShS dırektory D.B. Músenov.

Prokýror sottalýshylarǵa 7-den 11 jylǵa deıin bas bostandyǵynan aıyrý jazasyn taǵaıyndaýdy surady.

Jábirlenýshi tarap prokýrormen kelisti.

Qorǵaýshy tarap sottalýshylar Músenov pen Áshimdi aqtap, bas bostandyǵynan aıyrýmen baılanysy joq jaza taǵaıyndaýdy surady.

Sot ár sottalýshynyń qylmys jasaýdaǵy róli men qatysý dárejesin jáne kelgen zalal - 5,8 mıllıard teńgeniń 45 mıllıon teńgesi ǵana ótelgenin eskerdi.

Osylaısha sot:

- Amanjolovty - 10 jylǵa, Nurpeıisovti - 8 jylǵa, Áshimdi - 7 jylǵa;

- Ábdihamıtov, Achılov, Qasabaevty - 8 jylǵa jáne Mýsenovti - 7 jylǵa bas bostandyǵynan aıyrdy.

Sottalýshylar men azamattyq jaýapkerlerden shyǵyn somasy 5 833 300 827 teńge óndirip alynady.

Úkim zańdy kúshine engen joq.

Eske salsaq, Memleket basshysy Qasym-Jomart Toqaev Nur-Sultan qalasynyń ákimdiginde ótken májiliste LRT qurylysy isin tergeýdi jedeldetýdi tapsyrǵan bolatyn.

Іsti tergeý 2020 jyldyń basynda aıaqtaldy. Tergeý kezinde 10-nan astam adamnyń jaýapkershiligi tekserildi.

Sondaı-aq, 3 adamǵa Interpol jelisi arqyly izdeý jarııalanǵan.

Іs sotqa 2020 jyldyń 2 qazanynda joldandy.

Sybaılas jemqorlyqqa qarsy is-qımyl agenttigi 2-departamentiniń basshysy Sergeı Perov osy iske qatysty kúdikti dep tanylǵan Talǵat Ardan men Qanat Sultanbekovtiń qaıda júrgeni týraly aqparat bar ekenin málimdegen edi.


Jańalyqtar

MURAǴAT