Adam quqyǵy jónindegi ýákildiń mártebesi Ata zańmen retteledi
2022 jylǵy 11 mamyr 15:10

Adam quqyǵy jónindegi ýákildiń mártebesi Ata zańmen retteledi

NUR-SULTAN. QazAqparat – Konstıtýtsııada Adam quqyǵy jónindegi ýákildiń mártebesi bekitiletin bolady. Bul týraly QR Konstıtýtsııalyq keńesiniń apparat basshysy Baqyt Nurmuhanov aıtty, dep habarlaıdy QazAqparat tilshisi.

«Adam quqyǵy jónindegi ýákildiń konstıtýtsııalyq mártebesin retteý týraly másele burynnan kóterilip júrgen bolatyn. Eýropa keńesiniń Venetsııalyq komıssııasy kezinde qazaqstandyq ombýdsmenniń quqyqtyq negizderin qarastyryp, sol kezde de osyndaı usynys bergen. 2017 jylǵy konstıtýtsııalyq reforma kezinde adam quqyǵy jónindegi ýákil birinshi ret Konstıtýtsııa mátininde qosyldy. Ol Senattyń ókilettikterine qatysty. Prezıdenttiń usynýy boıynsha ombýdsmen 5 jylǵa taǵaıyndalady dep jazyldy. Endi bul is-sharaǵa qosymsha atalǵan ınstıtýttyń mártebesin, quqyqtyq jaǵdaıyn egjeı-tegjeıli Ata zańda retteý qajettiligi týyndap otyr. Onyń jalpy taǵaıyndalýy, mıssııasy, mindetteri, jumys isteý tásilderi — barlyǵy 7 taraýǵa, 83-1-bapqa engizilip otyr», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, túzetýlerde ombýdsmen ınstıtýty adam quqyǵyn qorǵaýǵa yqpaldasatyn, jalpy adam quqyqtaryn qorǵaý júıesin nasıhattaıtyn memlekettimizdegi ınstıtýttyń biri dep jazylady.

«Ol - táýelsiz laýazymdy tulǵa. Halyqaralyq tájirıbede solaı qalyptasqan. Onyń óziniń jumys isteý tásili bar. Ombýdsmenge de azamattardan, uıymdardan shaǵym-aryzdar túsip jatyr. Olardy qaraý tártibi bar. Ombýdsmen uıymdarǵa óziniń saýalyn joldaı alady. Ol sot protsesine azamattardyń múddesin qorǵaý maqsatynda talap aryzdaryn berýge quqyly jáne Parlamentke deıin, Prezıdentke deıin esebimen, usynystarymen shyǵa alatyn tulǵa», - dedi Baqyt Nurmuhanov.


Jańalyqtar

MURAǴAT