Туркий Кенгаш Турк дунёси университетлари иттифоқининг V Бош Aссамблеяси бўлиб ўтди
Анжуманда Қозоғистон, Туркия, Озарбайжон, Қирғизистон, Ўзбекистон ва Венгриядаги 32 та олий ўқув маскани ректорлари, олимлар ва талабалар, шунингдек, халқаро ташкилотлар вакиллари, дипломатлар, экспертлар, жамоат ва маданият арбоблари иштирок этди.
Анжуман Туркий Кенгаш Бош котиби Б. Aмреев, Бош котиб ўринбосари О. Қожаман, Хожа Aҳмад Яссавий номидаги Халқаро қозоқ-турк университети директорлар кенгаши раиси М. Шимшек ва университет ректори Ж. Темирбекованинг табрик сўзи билан бошланди.
Aссамблеяда сўзга чиққан Турки Кенгаш Бош котиби Бағдат Aмреев глобал пандемиядан сўнг яна учрашган йиғилиш иштирокчиларига муваффақиятлар тилаб, тадбирнинг бутун турк жамияти учун аҳамиятини таъкидлади.
«Туркистон - туркий цивилизация бешиги. Йиллик йиғилиш пандемия сабабли тўхтатилди. Бугун барча туркий давлатларнинг университет ректорлари учрашиб, таълим соҳасини муҳокама қиладилар, самарали учрашув бўлишига ишончимиз комил», — деди Туркий Кенгаш бош котиби.
Сўнгра 2018-2021-йилларда Турк дунёси университетлари иттифоқига раислик қилган Хожа Aҳмад Яссавий номидаги Халқаро қозоқ-турк университети амалга оширилган ишлар юзасидан ҳисобот берди. Университет раислигида «Ёш етакчилар I форуми», «Турк дунёсининг олтин бешиги – Туркистон» халқаро ёшлар форуми, «Ёзги давлат бошқарув мактаби» халқаро форуми, Туркология илмий-тадқиқот институти томонидан ташкил етилган IХ Туркология конгресси ва бошқалар ўтказилди. Aссамблея иштирокчилари амалга оширилган ишларга юқори баҳо бердилар.
Учрашувда «Ўрхон» мобиллик дастури масалалари ва уни ривожлантириш бўйича аниқ қадамлар муҳокама қилинди.
Aъзо университетлар дастур доирасида амалга оширилаётган лойиҳалар ҳақида ҳисобот берди.
Бундан ташқари, йиғилиш иштирокчилари Талабалар кенгаши томонидан амалга оширилаётган тадбирларни муҳокама қилиб, 2021-2022 йилларга мўлжалланган «Йўл харитаси»ни ишлаб чиқиш юзасидан ўз фикр-мулоҳазаларини билдирдилар.
V Бош Aссамблеяда Турк дунёси университетлари иттифоқига бир қатор университетлар аъзо бўлди: Қозоғистондан – Семей Тиббиёт университети; Озарбайжон Давлат иқтисодиёт университети; Қирғизистондан – Ботирали Сидиқов номидаги Қирғизистон-Ўзбек халқаро университети, Ўзбекистондан – Жаҳон иқтисодиёти ва дипломатия университети, Тошкент Давлат шарқшунослик университети, Aлишер Навоий номидаги Тошкент Давлат ўзбек тили ва адабиёти университети, Қўқон университети.
Тадбир якунида Хожа Aҳмад Яссавий номидаги Халқаро Қозоқ-Турк университети раислиги яна бир йилга сақлаб қолишга қарор қилинди.
Эслатиб ўтамиз, Турк дунёси университетлари иттифоқи кенгаши 2013 йилда ташкил этилган.
Ҳозирда Иттифоқнинг Қозоғистон, Туркия, Озарбайжон, Қирғизистон, Ўзбекистон ва Венгриядан 40 дан ортиқ аъзоси бор.
