Туркистон вилоятидаги сел: Яна учта тумандаги овуллар сув остида қолди

Қазиғурт тумани ҳокимиятидан маълум қилишларича, кеча соат 19:30 атрофида ўт ўчирувчилар бўлимига Алтинтўбе, Жигерген, С.Рахимов овул округлари аҳолисидан ҳовлида ёмғир суви йиғилганлиги тўғрисида хабар келиб тушган.

«Қазиғурт тумани Фавқулодда вазиятлар бўлими ва туман ҳокимлиги ходимлари сув Алтинтўбе қишлоқ округи ва Қаржан қишлоғида 2 уй, 1 поликлиника, 1 дорихона ҳовлисига сув кирганлигини аниқладилар. Жигерген овул округида 30 уйнинг ҳовлисини сув босди ва 4 та омбор қулаб тушган. С.Рахимов овул округининг Қизилата қишлоғида 4 уй ва 1 масжиднинг ҳовлисига сув кирган. Кўкибел сув омборини сув босиши (151,0 минг куб метр) туфайли Кўкибел овулидаги 27 оиладан 133 киши Кўкибел мактабига эвакуация қилинди ва озиқ-овқат ва тиббий жиҳозлар билан таъминланди. Воқеа жойида 30 нафар ўт ўчирувчилар, 15 та туман ва овул ҳокимликлари ходимлари 6 та транспорт воситаси ва 5 та моторли насос ёрдамида ҳовлилардан сув тортмоқда. Ҳеч ким жабрланмади. Ҳозирда вазият тўлиқ назорат остида ва етказилган зарар ҳисоблаб чиқилмоқда», - дейилади хабарда.

Сайрам туманида кучли ёмғир туфайли, Ақсукент, Қарасу, Қорабулоқ ва Манкент қишлоқларидаги 7 та уйнинг ҳовлисида сув йиғилган. Туман ҳокимлиги, Фавқулодда вазиятлар бошқармаси ва қишлоқ ҳокимлари тегишли профилактика чораларини ўз вақтида амалга ошириб, ҳовлидаги сувни мотопомпа ёрдамида тортиб олишган.

Бундан ташқари, кучли ёмғир туфайли Байдибек тумани сув остида қолди. Ақбастау овул округининг Турақти қишлоғида ёғингарчилик туфайли Тутариқ канали 4 жойидан шикастланган ва овул сув остида қолган.