Самарқандда Қозоғистоннинг Бош консуллиги очилди
«Қозоғистон Республикасининг Самарқанд шаҳрида Бош консуллигининг очилиши давлатларимиз раҳбарлари ўртасидаги келишув натижасидир. Бугунги кунда Ўзбекистон Қозоғистоннинг Марказий Осиёдаги энг йирик савдо шериги бўлиб, ушбу йўналиш минтақа мамлакатлари билан товар айирбошлаш ҳажмининг 50 фоизидан ортиғини ташкил этади. Ўз навбатида, ўзбек бизнеси Қозоғистон бозорини фаол ривожлантирмоқда. Буларнинг барчаси давлатларимиз раҳбарлари Қасим-Жомарт Кемелевич Тоқаев ва Шавкат Миромонович Мирзиёевнинг саъй-ҳаракатлари, Қозоғистоннинг Биринчи Президенти - Елбасы Нурсултон Абишевич Назарбоевнинг шахсий ҳиссаси туфайли амалга ошмоқда», - деди Д. Сатибалди ўзининг қутлов нутқида.
Қозоғистонлик дипломатнинг сўзларига кўра, Самарқанд Ўзбекистоннинг стратегик марказидир ва муҳим сайёҳлик, иқтисодий ва транспорт салоҳиятига эга, шунинг учун ҳам Самарқандда Бош консулликнинг очилиши бежиз эмас.
«Таъкидлаш жоизки, бугунги кунда Самарқанд нафақат қозоғистонлик сайёҳлар, балки бизнес учун ҳам диққатга сазовор жойдир. Шаҳар нафақат бой тарихий ўтмишга, балки истиқболли келажакка ҳам эга. Яқин келажакда Самарқанд миллионер шаҳар мақомига эга бўлади. Бу унинг сиёсий мақомини оширади, сайёҳлик имкониятларини кенгайтиради ва инвестиция жозибадорлигини оширади. Ишончим комилки, Самарқанд шаҳридаги Бош консуллик фаолияти яхши қўшничиликка асосланган қозоқ-ўзбек алоқаларини фаоллаштиришга катта ҳисса қўшади», - деди Дархан Сатибалди.
Самарқанд вилояти раҳбари Э.Турдимов Қозоғистон дипломатик ваколатхонасининг очилишининг тарихий аҳамиятини таъкидлади, бу икки мамлакат ўртасидаги стратегик ҳамкорликни кенгайтириш йўналишига тўлиқ мос келишини айтди.
«Шубҳасиз, бу бизнинг тарихимизда қолади. Биз Қозоғистоннинг Самарқанддаги бош консулини қўллаб-қувватлаш учун қўлимиздан келганича ҳаракат қиламиз. Қозоғистон-Ўзбекистон алоқаларининг сифат жиҳатидан янги даражадаги ўсиши икки қардош халқнинг узоқ муддатли дўстона манфаатларига тўла жавоб беради ва Марказий Осиё ҳудудларидаги тинчлик, барқарорлик, хавфсизлик ва тез ривожланишни таъминлашда муҳим омил бўлиб хизмат қилишини таъкидламоқчиман», - деди Самарқанд вилояти ҳокими Эркинжон Турдимов.
Муаллиф: Мадибек Жанибеков