Россия газининг узилиши муносабати билан Германия кўмир электр станцияларини ишга туширади

Германия Иқтисодиёт вазири Роберт Хабекнинг таъкидлашича, мамлакат электр энергияси ишлаб чиқариш учун газдан фойдаланишни чеклаши ва Россиядан етказиб берилаётган кам таъминотни қоплаш учун омборларни тўлдиришга устувор аҳамият бериш керак.

Россиянинг «Газпром» газ компанияси ўтган ҳафтада Германиянинг Siemens Energu компанияси компрессор турбиналарини таъмирлашдаги кечикишларни баҳона қилиб, «Шимолий оқим 1» қувуридан газни техник сабабларга кўра узиб қўйганини эълон қилди.

Германия Иқтисодиёт вазирлиги электр энергияси ишлаб чиқариш учун кўмирда ишлайдиган электр станцияларидан кўпроқ фойдаланиш зарурлигини эълон қилди, бу эса мамлакатнинг экологик сиёсатига зиддир. Коалицион ҳукумат 2030 йилгача Германияда электр энергияси ишлаб чиқаришда кўмирдан фойдаланишни бутунлай тўхтатишни ўз олдига мақсад қилиб қўйган.

Германия ҳукумати, шунингдек, Германиянинг минтақавий газ бозори менежери Тrading Hub Europeга омборларни тўлдириш учун газ сотиб олиш имконини бериш учун КFW давлат банки орқали қўшимча 15 млрд евро кредит линияси тақдим этишни режалаштирмоқда.

Федерал тармоқ агентлиги раҳбари Клаус Мюллер янги қонунчиликни эслатиб ўтди, унга кўра немис омборларида 90% дан ортиқ газ бўлиши керак. Бироқ, улар ҳозирда тахминан 57% тўлган.

Муаллиф: Рустем Қожибаев