Қозоғистонда йил бошидан бери 82,5 млн тонна нефть қазиб олинди

«2019 йил январь-ноябрь ойларида ишлаб чиқариш ҳажми 82,5 млн тоннага етиб, режа 101,8% бажарилди. 2019 йил охиригача бу кўрсатгични йиллик режадан ортиғи билан бажариб, 90,5 млн тоннагача етказиш кўзда тутилмоқда», - деди энергетика вазири ўринбосари Асет Мағауов Ҳукумат матбуот марказида бўлиб ўтган брифингда.

Унинг айтишича, 90,5 млн тонна нефтнинг 17 млн тоннаси Қозоғистоннинг ўз эҳтиёжлари учун қолдирилиб, қолгани экспорт қилинади. Бу борада 2019 йилда 3та йирик лойиҳада таъмирлаш ишлари олиб борилган. Капитал таъмирлаш ишларидан сўнг, Қашаған нефть конида нефть қазиб олиш ҳажми суткасига 370 минг баррельга етди.

«Тенгиз нефть конларини келажакда кенгайтириш ва Қашаған конида газ ҳайдаш қувватини орттириш лойиҳалари ҳисобидан 2023 йилдан эътиборан ишлаб чиқариш ҳажми 100 млн тоннагача кўпайтириш имконияти кўриб чиқилмоқда. Қолган компаниялар бўйича нефть қазиб олиш ҳажми табиий камайиши прогноз қилинмоқда. Масалан, Қизилўрда вилоятидаги конларда нефть қазиб олиш ҳажми камайиши кутилмоқда», - деди у.

Муаллиф: Аян Бекенўғли