БМТ: Пандемия даврида аёллар кўпроқ зўравонликка учраган

Ҳисобот БМТ Aёллар ташкилоти томонидан тайёрланган. У 13 та давлат иштирокида ўтказилган сўровга асосланади.

Сўров карантин вақтида уйда қамалган аёллар бошқа пандемия – зўравонлик эпидемиясининг қурбони бўлганини кўрсатди.

«Биз бу вазиятни ҳал қилиш учун биргаликда ҳаракат қилишимиз керак», - деди «БМТ-Aёллар» ташкилоти ижрочи директори Сима Бахус.

Шунингдек, зўравонлик қурбонлари руҳий ва ҳиссий стрессдан 1,3 баробар кўпроқ азоб чекиши аниқланди.

Ҳар тўрт аёлдан бири пандемия пайтида ўзини ҳимоясиз ҳис қилди. Aсосий сабаб - оила аъзолари ёки шериклар томонидан жинсий ва жисмоний зўравонлик.

Сўровда қатнашган аёлларнинг 40 фоизи пандемия бошланганидан бери ёлғиз юришдан қўрқишини айтди. Ҳар беш аёлдан учтаси жамоат жойларида жинсий зўравонлик ҳолатлари кўпайганини қайд этди.

БМТ Бош котиби аёлларга нисбатан зўравонликни камайтириш учун тегишли чоралар кўриш зарурлигини таъкидлади.