Жылуға қатысты Жаңатастағы оқиға: Аудан әкімі қызметінен кетті
Қазақстан Республикасы Президенті Әкімшілігінің келісімі бойынша Жамбыл облысы әкімінің өкіміне сәйкес, Жақсылықов Бақытжан Алпысұлы Сарысу ауданы әкімінің қызметінен босатылды.
Бақытжан Жақсылықов бұл лауазымға өткен жылдың 4 шілдесінде тағайындалған еді.
Еске сала кетсек, 9 ақпанда Сарысу ауданындағы Жаңатас қаласында орталық қазандық істен шығып, 20 мыңнан астам адам үш күн бойы жылусыз және ыстық сусыз қалған болатын. Нақтырақ айтқанда, барлығы 92 көпқабатты үй және 40-тан астам бюджеттік мекеме жылудан ажырады.
Кейін бұл жағдай облыс әкімі Бердібек Сапарбаевтың төрағалығымен өткен кеңесте жан-жақты талқыланып, апатқа кінәлілер тиісті жазасыз қалмайтындығы айтылды.
Төтенше жағдайға қатысты арнайы комиссия құрылып, зерделеу жұмыстары жүргізілді.
Сондай-ақ, жуырда ғана облыстағы Меркі және Жуалы аудандарының әкімдері ауысқан еді.