10:04, 18 Сәуір 2022 | GMT +6
Жыл соңына қарай QazVac вакцинасын ДДҰ-да тіркеудің үшінші деңгейі жүзеге асады - Тоғжанов
НҰР-СҰЛТАН.ҚазАқпарат - Премьер-Министрдің орынбасары Ералы Тоғжанов Дүниежүзілік денсаулық сақтау ұйымы неліктен QazVac-ты әлі тіркемей отырғаны туралы Egemen Qazaqstan газетіне берген сұхбатында айтты, деп хабарлайды ҚазАқпарат.
«Дүниежүзілік денсаулық сақтау ұйымы QazVac вакцинасын тіркеуі үшін Қазақстан ұлттық реттеушіні үшінші деңгейге дейін жеткізуі қажет. Басқаша айтқанда, республиканың санитарлық-эпидемиологиялық қызметінің материалдық-техникалық базасы халықаралық стандарттарға сәйкес болуы тиіс. Осының барлығын ретке келтіру үшін 3 жылдан 5 жылға дейін уақыт кетеді деген сарапшылар пікіріне қарамастан, біз былтыр іс жүзінде 7 айдың ішінде Қазақстанды ұлттық реттеушінің екінші деңгейіне шығардық. Бұл фактіні біздің еліміздің халықаралық талаптарға сәйкестігін тексерген ДДҰ арнайы комиссиясы растады. Биыл жыл соңына қарай үшінші деңгейге шыға аламыз деп ойлаймын», - деді Ералы Тоғжанов.