Журналистер Бақытбек Есентаевтың сотын жүргізген судьяның үстінен арызданбақ
«Мен таңертең Алматы облыстық сотының баспасөз қызметінің өкілі Айнаш Рахимоваға звондап ескерттім. Біз үкім оқылғанда сот залына кіруге құқылы екеніміз жөнінде айттым. Себебі, сот жабық түрде қаралса да үкім оқылғанда БАҚ өкілдері қатысады. Айнаш Рахимова менің талабымды түсінді және журналистердің сот залына кіруін қадағалап, ұйымдастырып беретінін айтты. Одан кейін мен істі жүргізіп жатқан судьяның хатшысын да шақырып алып, ескерттім. Ол әрине, БАҚ өкілдері сот үкімі оқылғанда залға кіреді деді. Ал соңында міне көріп отырсыздар. Біз бұл жайтты бұлай қалдырмаймыз. Судьяның үстінен арыз жазамыз», - деп мәлімдеді журналист Әлия Ахмедиева.
Телеоператорлар да өз наразылықтарын білдіруде.
«Сот жабық болғандықтан видео жинау оңай емес. Есіктің алдында тұрдық. Сот залына кірсек біз тәуір видео да жинайтын едік. Ал қазір менде видео да жоқ. Менің табысым түсірген видеоға байланысты бағаланады. Енді судьяның үстінен арыз жазғаннан басқа амал жоқ», - деп оператор Сыйхат Хасенде өз өкпесін білдірді.
Сондай ақ кейбір БАҚ өкілдері Бақытбек Есентаевтың сотында мемлекеттік айыптаушы Арыстан Аликеновтың сотталушыны 15 жылға соттауды сұрағаны жөнінде жазған. Тағы да бір топ журналистер бұл ақпараттың қайдан шыққаны жөнінде аң-таң. Ал, барлық БАҚ өкілдеріне процесс жабық түрде өтіп жатқандықтан, прокурордың қанша жылға бас бостандығынан айыру жазасын сұрағандығы жөнінде жария етілмейді. Бұл заңға қайшы деп, облыстық соттың баспасөз қызметінің өкілі журналистерге шегелеп тұрып айтып, ескерткен еді. Бірақ, ақпарат тағы да тарап кетті. Алайда, Алматы облысы прокуратурасының баспасөз қызметі аталған жайт бойынша ешкім сұхбат бермегенін айтты. Және бұл жайтты анықтаймыз деп жеткізді.
Енді құқықтары тапталған журналистер судья Берікжан Байжүнісовтың үстінен арыз түсіреді. Және қандай шара қолданылатынын жіті назарда ұстайды.
Естеріңізге сала кетейік, бүгін Бақытбек Есентаевтың соңғы сот отырысы өтті. Адам өлтіруге оқталу бабы бойынша кінәлі деп танылған Бақытбек Есентаев 9 жылға бас бостандығынан айырылды.
Айта кету керек, 10 маусымда Бақытбек Есентаев әйелі Баян Есентаеваны соққыға жығып, пышақтаған. Белгілі продюсер ауыр халде ауруханаға жеткізіліп, ота жасалды. Қазір Баян Мақсатқызы бұрынғы күйеуін толықтай кешірді және бас бостандығынан айырмауды да сұраған еді.