Жұмыссыз қалған «ҚазМұнайГаз» қызметкері өтемақы алады
«ҚазМұнайГаз» компаниясының орталық аппаратынан босап қалған қызметкерлердің 10 пайызы – біздің еншілес кәсіпорындарға қызметке барады. Олардың карантин шаралары енгізілмес бұрын еншілес компаниялардағы топ-позицияларда еңбек ететініні шешілген. Сонымен бірге, біліктілігі жоғары техникалық қызметкерлер еншілес ұйымдардағы орташа санаттағы вакантты позицияларда жұмыс істейді. Қызмектерлердің қалған 90 пайызы «ҚазМұнайГаз» жүйесінен кетеді», - деді Дәулетжан Хасанов ОКҚ-да өткен баспасөз мәслихатында.
Еңбек нарығындағы күрделі мәселеге байланысты «Самұрық-Қазына» қоры жұмысынан босап қалған қызметкерлер үшін «ҚазМұнайГаз» компаниясының алдына біршама міндет жүктеген.
«Ол қолдау шараларына өтемақы төлемдерінің пакеті кіреді. Біріншіден жұмысынан босап қалған қызметкерлер 3 айлық еңбекақы көлемінде бірыңғай өтемақы алады. Екіншіден оларға айлық жалақысының жартысына тең - тағы алты ай бойы қаржылық көмек көрсетіледі. Яғни, бұл тағы үш реттік айлық еңбекақы мөлшерінде төлем беріледі деген сөз. Әлеуметтік тұрғыдан қорғалған – жұмыстан босап қалған қызметкерлерге берілетін өтемақы көлемі – 12 айлық төлемақыға тең болады. Үшіншіден босап қалған әрбір қызметкер мен оның отбасындағы адамдар 2021 жылдың ақпан айына дейін компанияның есебінен медициналық сақтандыру қызметтерін пайдалана алады», - деді ол.
Сонымен бірге «ҚМГ»-ның босап қалған қызметкерлеріне несие беру кезіндегі жеңілдетілген пайыздық ставка күшінде қалады.
«Сондай-ақ, оларды жұмысқа тұрғызуда да көмек қолын созамыз. Персоналдың босап қалуы – өте күрделі жағдай екенін түсінеміз. Кейбір адам мұндайда тығырыққа тіреліп қалуы мүмкін. Мәселен бір компанияда жұмыс істеп үйреніп қалған азамат басқа жерден жұмыс таба алмай қалуы ықтимал. Біздің міндет – оларға көмектесу. «Оутплейсмент» атты бағдарлама арқылы оларға карьерлік кеңесші бөліп, дағдылары сарапталып, оларды оқытамыз. Осының бәрі оларды ары қарай жұмысқа орналастыруда көмек болары сөзсіз», - деді ол.
Еске сала кетсек бұған дейін Дәулетжан Хасанов компанияда дағдарысқа қарсы стратегия жасалып жатқанын мәлім еткен болатын.