Жезқазған көшелерінде волонтерлер тегін маска таратуда

Жезқазған қаласының Жастар ресурстық орталығына қарасты «Жылы жүрек» еріктілер ұйымы короновирустың алдын алу мақсатында шаһардың орталық көшесінде екі күн қатарынан халыққа тегін маска үлестірді. Қорғаныш бетпердені волонтерлер қажетті материалды сатып алып, өз қолдарымен үй жағдайында тікті. Екі күнде көшедегі халыққа, сондай-ақ аз қамтылған, көпбалалы отбасыларға, мұқтаж жандарға 600 маска тегін таратылды. Волонтерлер күніне 300 маскадан тігіп, тарату үстінде. Бұл акция күн сайын жалғасуда.

Демалыс күндері еріктілер автовокзал маңайында жолаушыларға, тұрғындарға 150 маска таратқан.

Үш күн аралығында қолдан 1 мың маска тігілген.

Сондай-ақ жезқазғандық кәсіпкер Ернар Ахметов басшылық етіп отырған «Тұран» мейрамханасының қызметкерлері бірнеше күннен бері маска тігумен айналысуда.

«Ел басына күн туған сәтте халықпен бірге ауыр жүкті көтеруге кіріскен азаматқа алғысымыз шексіз. Бүгін сағат 15.00-ге дейін тігілген 150 масканы Жезқазған жастар ресурстық орталығының қызметкерлері мен қала еріктілері базар жаққа шығып таратты», - деп жас волонтерлер әлеуметтік желіде алғыстарын білдіруде.