Жедел жәрдем көлігінсіз қалған ауыл тұрғындарына Алматы облысының әкімдігі жауап берді

«Біз Шанханай ауылдық округінің тұрғындарымыз. Округке берілген жедел жәрдем көлігінің жөндеуде тұрғанына үшінші айға кетті. Үш-төрт мың халқы бар елге қиын болды. Карантин дегеніңіз мынау. Ел қиналып жатыр. Бізге көмектесуіңізді сұраймыз», - деп ауыл тұрғындары әлеуметтік желіге видео жариялады.

Алматы облыстық Денсаулық сақтау басқармасының баспасөз қызметі ҚазАқпарат тілшісіне берген ресми жауабына сәйкес, жаңа жедел жәрдем көліктері өңірге 2 кезеңмен жеткізіледі. 1 қазанға дейінгі алғашқы кезеңде – 12 көлік, 1 қарашаға дейінгі екінші кезеңде 180 көлік алынбақ.

Кербұлақ ауданына 1 қазанға дейін 1 жедел жәрдем көлігі берілгенімен, ол аудан орталығынан 100 шақырым жерде орналасқан Көксу ауылына жебіреледі. Ал аудан орталығынан 50 шақырым жерде орналасқан Шанханай ауылдық округіне жаңа жедел жәрдем машинасын 1 қарашаға дейін беру жоспарланған.

«Жергілікті бюджеттен емханалар жанындағы 4 санат бойынша медициналық көмек көрсететін жедел жәрдем бригадаларына 30 бірлік автокөлік сатып алуға қаржы бөлінді. Биылғы 1 қазанға дейін облысқа 12 жылжымалы медицина кешені жеткізіледі. Кербұлақ ауданына 1 қазанға дейін бір жедел жәрдем көлігі беріледі», - делінген ведомство жауабында.

Мәлім етілгендей, қазіргі уақытта облыста 165 жедел жәрдем бригадасы жұмыс істейді. Лизинг бойынша 105 жедел жәрдем автокөлігін жеткізу күтілуде.

«Бұдан басқа, «СарыарқаАвтоПром» ЖШС мен «Самұрық - Қазына» АҚ гуманитарлық көмек аясында 18 бірлік санитарлық автокөлік берді.

Биылғы 1 қарашаға дейін 180 бірлік автокөлік сатып алынады. Бұл автопаркті 50% жаңартуға және бригадалар санын 205-ке дейін арттыруға мүмкіндік береді», - деді басқармадан.