Жамбылдық өнертапқыш өзін-өзі жөндейтін трактор құрастырып шығарды

Жанболат Әмір есімді жас өнертапқыш шаруашылыққа, құрылысқа қажетті әмбебап техникаларды ойлап тауып, құрастырумен айналысады. Бүгінге дейін 3 шағын трактор жасап шығарған ол биыл жер жыртып, шөп шауып, құрылысқа қажетті бетонды араластырып, құм сала алатын трактор жасап шығарды. Ерекше айта кетерлігі, аталған трактор өзінің ақауларын өзі жөндеп, қайта іске қоса алады.

«Бұл менің сүйікті ісім. Ынта және тынымсыз еңбек болса, ойда жүрген дүниелерді жүзеге асыруға болады. Құрастырған тракторымды алдағы көктемгі дала жұмыстарында сынап көремін. Бұл техникамен бір емес бірнеше жұмыстарды жүргізу болады. Мұны құрастыруға көптеген жарамсыз техникалардың материалдарын пайдаландым. Сондай-ақ, бұл трактор өз кемшілігін өзі шұғыл реттеп, жұмысты үздіксіз атқаруға мүмкіндік береді»,-дейді Жанболат.

Сонымен қатар, ол бұл бағыттағы жұмыстарын жалғастыра беруге, әлі де тың идеяларды іске асыруға ниетті.