Жамбыл облысында 3 су қоймасы салынса, Қырғызстанға тәуелділік азаяды - министр
11:32, 17 Маусым 2022
НҰР-СҰЛТАН. ҚазАқпарат – ҚР Экология, геология және табиғи ресурстар министрі Серікқали Брекешев қырғыз тарапынан алатын судың бір бөлігін жергілікті су қоймаларын салу арқылы қамтамасыз етуге болатынын айтты, деп хабарлайды ҚазАқпарат тілшісі.
«Шу және Талас өзендері бойынша қырғыз тарапымен мемлекетаралық пайдаланудағы гидротехникалық құрылыстарды күтіп ұстауға және реконструкциялауға бөлінетін қаржыны көбейту бойынша жұмыс жүргізіліп жатыр», - деді ол Мәжіліс қабырғасындағы Парламенттік тыңдауда.
Оның айтуынша, Шу мен Таластан су алып отырған өңірлерде жерасты суын пайдалану көлемі ұлғаймақ.
«Қырғыз тарапына тәуелділікті азайту үшін Жамбыл облысында 3 су қоймасын салу жұмысы басталып, суару қажеттігі үшін жерасты көздерін пайдалану көлемі ұлғаяды», - деді Серікқали Брекешев.
Мәжіліс төрағасы Ерлан Қошановтың мәліметі бойынша, 2040 жылға қарай Қазақстанда су тұтыну 46 пайызға артады.