Вакциналаудың электронды паспорты не үшін қажет

Орталық коммуникациялар қызметінде өткен баспасөз мәслихатында вице-министр «Вакцинация электронды паспортының заңды күші бар ма? Вакцина алмағандарға қандай да бір шектеу қойыла ма?» деген сұраққа жауап берді.

«Электронды паспорты енгізудің басты мақсаты – иммундық статусты білу және болашақтағы вакциналауды жоспарлау. Өздеріңізге мәлім, соңғы екі жылда қағазсыз ауруханаға ауысып, деректерді, операцияларды ақпараттық жүйеге енгізіп жүрміз. Бұл ақпараттың медициналық қызметкерге ғана емес, жалпы халыққа қолжетімді болуы үшін мобильді қосымша, эл үкімет арқылы ақпарат алуға болады. Бұл расында да болашақта коронавирусқа қарсы вакциналауды жоспарлау үшін және иммундық статусты анықтау үшін жасалады. Ал вакциналау паспорты жоқ тұрғындарға ешқандай шектеу әзірге көзделмеген және ондай мақсат қойып отырған жоқпыз», - деп жауап берді Марат Шоранов.

Бұған дейін вице-министр коронавирус инфекциясына қарсы вакцинаның қандай жағдайда салынбайтынын айтқан еді.

Вакциналау туралы толық ақпаратты агенттіктің арнайы айдарынан оқуға болады.