«Үркер» мен «Тұмар» сыйлықтарына «Шетелдегі қазақтілді БАҚ» номинациясын қосу ұсынылды

«ҚР Ақпарат және қоғамдық даму министрлігі арқылы елімізде жыл сайын ұйымдастырылатын «Үркер» ұлттық сыйлығы мен «Тұмар» ұлттық телевизиялық сыйлығына шетелдегі қазақтілді БАҚ-қа арналған жеке номинация тағайындауды ұсынамыз. Былтыр «Отандастар қорының» ұсынысымен «Үркер» сыйлығы аясында «ҚазАқпараттың» 100 жылдығына арналған 1 миллион теңгелік сыйлық Моңғолиядағы «Кaznews.mn» сайтына берілді. Енді осы ұлттық сыйлықтардың бір номинациясы жыл сайын тұрақты түрде шетелдегі қазақтілді БАҚ өкілдеріне беріліп отыруын сұраймыз», - деді М. Сарбасов Отандастар қоры жанындағы қоғамдық комиссия отырысында.

Сонымен бірге 2021 жылы шетелдегі қазақтілді БАҚ-тың бірлестігі құрылмақ. Осы бірлестік арқылы жылына бір рет әлемдегі қазақтілді БАҚ өкілдерінің пленарлық отырысын өткізіп, өзекті мәселелерді талқылап, өзара тәжірибе мен ақпараттық өнімдер алмасу ұсынылды.

«Ақпарат комитетінің мәліметінше, «Qazaq TV» телеарнасы 120 елдегі спутниктік және кабельді телеарналарға қосылған. Көрші Ресейде 39 кабельді топтамаға, ал «Хабар 24» телеарнасы ақылы кабельді арналардың 30 операторлық топтамасына енгізілген. Шетелдегі этникалық қазақтар тарапынан «Qazaq TV» және «Хабар 24» телеарналарынан атамекенге көшіп келіп жетістікке жеткен, үлгі алатын қандастар туралы танымдық, тағылымдық бағдарламалар, қазақ тілі мен домбыра тартуды үйрететін және тағы басқа арнайы хабарлар ашылса деген ұсыныстар мен өтініштер көптеп түсуде», - дейді Мағауия Сарбасов.

Бұған дейін спикер шетелдегі қазақтілді БАҚ-ты қолдау мәселелерін көтерген еді.

https://kaz.inform.kz/news/shet-elderde-kazak-tilinde-kansha-bak-bar_a3763587