Үнді дәрігерлерінің жолбарыстың табанына протез орнату әрекеті сәтсіз болды

НЬЮ-ДЕЛИ. ҚазАқпарат – Үнділік дәрігерлер жолбарыс табанына протез орнатуға әрекеттенді. Бірақ бұл сәтсіз аяқталып, түз тағысы жасанды аяқты қабылдамай қойды. Бұл туралы ҚазАқпарат The Times of India газетіне сілтеме жасап хабарлайды.

Басылымның хабарлауынша, отаны сенбі күні Махараштра штатының Нагпур қаласындағы емханада ветеринарлар мен ортопедтер жасаған. Сахебрао атты жолбарыс наркоздан кейін есін жиған сәтінде тұруға әрекет жасамай, протезді жұла бастаған, дәрігерлерге бұл құрылғыны бөлшектеп, қайта жасауға тура келген.

«Біз кейінірек отаны әлемдегі ірі эксперттермен байланысқаннан кейін жаңаша жоспар құрамыз. Әзірге бұл сәтсіз әрекетімізге өкінуден басқа шара жоқ», - деді отаны жасаған танымал ортопед Шушрут Бабхулкар.

Тоғыз жастағы Сахебрао 2012 жылы Чандрупур округіндегі Тадоба-Андхари қорығында браконьерлердің тұзағына түсіп, сол жақ алдыңғы табанынан айырылған болатын.