00:50, 30 Шілде 2020 | GMT +6

«Ұмай» фильмі Словакияда халықаралық фестивальде жеңімпаз атанды

НҰР-СҰЛТАН. ҚазАқпарат - Режиссер Іңкәр Әбдіраштың «Ұмай» («Мальчик у окна») қысқаметражды фильмі Словакияның ай сайын өтетін Kosece International Monthly Film Festival халықаралық кинофестивалінде «Үздік режиссер-дебютант» сыйлығын иеленді. Бұл жайлы «Қазақфильм» киностудиясына сілтеме жасап ҚазАқпарат хабарлайды.

KIMFF фестивалінің мақсаты - дүниежүзіндегі талантты режиссерлерді қолдап, оларды насихаттау. Словакияның жас кинематографистерінен құралған фестивальдің қазылар алқасы әр ай сайын жеңімпаздарды анықтайды.

Жыл соңында лауреаттар өз номинациясы бойынша кинофестивальдің басты жүлдесі үшін күреске түседі. Жылдық жүлделерді табыстау рәсімі 2021 жылы мамырдың 26 мен 28 аралығына жоспарланған.

Естеріңізге салайық, Іңкәр Әбдіраштың дебюттік фильмінің желісі өзімшіл актрисаның өмірін түбегейлі өзгертетін балалар үйінің тәрбиеленушісі туралы баяндайды. Картинаның продюсерлері – Фархат Әбдрайымов пен Гүлшат Смағұлова.

Бұдан бұрын «Ұмай» фильмі British International Amateur Film Festival (BIAFF) Халықаралық әуесқойлар кинофестивалінде «Ең үздік фильм», «Ең үздік сценарий» номинациясы бойынша топ жарған болатын. Сондай-ақ фильм Х Dadasaheb Phalke Film Festival (DPIFF) Халықаралық кинофестивалінде үздік қысқаметражды фильм жүлдесін жеңіп алды.

Фильмді ҚР Мәдениет және спорт министрлігінің тапсырысымен Ш.Айманов атындағы «Қазақфильм» киностудиясының «Дебют» шығармашылық бірлестігі түсірді.

Тегтер:

Мәдениет Халықаралық ұйымдар Өнер

Соңғы жаңалықтар

Одан да көп жаңалықтар біздің Телеграм-арнамызда!