14:55, 28 Сәуір 2021 | GMT +6
Түркия дәрігерлері тәжірибе бөлісу үшін Түркістанға келді
ТҮРКІСТАН. ҚазАқпарат - Түркістанда Халықаралық симпозиум басталды, деп хабарлайды ҚазАқпарат.
27-28 сәуір күндері Түркияның үздік хирург дәрігерлері өз тәжірибелерімен бөліседі.
Шара барысында балалардың туа біткен аурулары мен сүт безі қатерлі ісігін ота әдісімен емдеу мәселелері талқыланбақ.
Айта кетсек, симпозиумға Түркияның «Лив Улус» клиникасының білікті дәрігерлері арнайы келді. Бүгінде Түркияның 17 қаласында аталмыш мекеменің 37 ауруханасы бар.
Жиында алғашқы болып хирургия саласында 33 жылдық тәжірибесі бар Селами Сезюбир сөз сөйледі.
Оның айтуынша, пандемия жағдайында B2B форматында кездесу ұйымдастыру дәрігерлер үшін зор мүмкіндік.
«Бүгінгі кездесу біз үшін өте маңызды. 33 жыл хирургия саласында қызмет етіп келемін. Менің Қазақстаннан келетін науқастарым көп болған. Бір байқағаным қазақстандық дәрігерлердің тәжірибесі мол. Сондықтан бүгінгі жиын барлығымыз үшін пайдасы зор. Өзара тәжірибемен бөлісіп, біліктілігімізді арттыратын боламыз»,- дейді профессор Селами Сезюбир.
Шараға Түркістан облысының дәрігерлері де қатысуда. Аймақта бүгінде жалпы 23 429 медицина қызметкері бар. Оның 5 мыңнан астамы дәрігерлер, қалғандары орта буын мамандары.
Елімізде жыл сайын ана мен бала денсаулығын сақтауға ерекше көңіл бөлініп келеді. Президент Жолдауларында, денсаулық сақтау саласын дамытуға арналған бағдарламаларда бұл мәселе назардан тыс қалған емес.
