Түркістандық диқандар тікелей себу әдісімен күздік астық егуді бастады

Ауыл шаруашылығы саласында жаңа технологиялардың пайдаланылуы жайында Қазығұрт ауданына қарасты «Шарбұлақ» ауылдық округінде семинар-кеңес ұйымдастырылып, басқосуға облыс әкімі Өмірзақ Шөкеев пен агробизнес өкілдері, аудан-қала әкімдері мен шаруалар қатысты.

Ашық аспан астында өткен жиында сүр танапта қалдырмай тікелей себу әдістерін әлемнің дамыған елдері, атап айтқанда АҚШ, Канада, Бразилия, Аргентина елдерінің шаруалары кеңінен пайдаланаиыны сөз болды.

Мамандардың сөзінше, соңғы жылдары көп елдерде нольдік технологияны пайдалану арқылы өсірілетін егістіктің көлемі артып келеді. Айдалмаған жерге дақылдарды тікелей себу Қазақстанның солтүстік аймақтарында да, әсіресе шөлейтті, су және жел эрозиясына ұшыраған жерлерде, дәнді дақылдарды нольдік технологиямен өсірудің тиімділігі дәлелденді.

«Жаңа технологияларға міндетті түрде көшуіміз керек. Өйткені мына бәсекелестік заманда дәстүрлі технология алысқа апармайды бізді. Біз кірісейік енді осыған. Нольдік технологияны өте белсенді қолға алып жатқан шаруа қожалықтары бар. Бұл жерде батылдық керек. Бізде бір жақсы жері 5 мың гектарлық алқаптар, ол үлкен емес. Елімізде алды миллион гектарға дейін егетін облыстар бар»,-деді Өмірзақ Шөкеев.

Жиында облыстық ауыл шаруашылығы басқармасының басшысы Нұрбек Бадырақов Қазақстандағы мақтаны сатып алу бағасының бекітілуін жариялады.

Өңірдегі 18 мақта өңдейтін кәсіпорын шитті мақтаның тоннасын 130 мың теңгеден қабылдауды бастады.

Іріленген агроқұрылымдар үшін шитті мақта бағасы әлі де өседі деп күтілуде.