Түркістанда азаматтық некедегі әйелін атып өлтірген тұрғын 18 жылға сотталды
14:41, 15 Маусым 2022
ТҮРКІСТАН. ҚазАқпарат – Сот үкімі 1 маусымнан бастап занды күшіне енді. Ал, жәбірленушінің соңында 3 баласы жетім қалды, деп хабарлайды ҚазАқпарат тілшісі.
Оқиға 10 қаңтар күні болған. Түркістан қаласы Ақбастау көшесі №46 үйде Фарида Молдабаеваны белгісіз біреу атып кеткен.
Кейіннен күдіктінің марқұмның азаматтық некедегі күйеуі екені белгілі болды.
Келіншектің басқа ер адаммен сөйлескенін көрген ол жанжал шығарып, соңында екі ауыздық 16 калибрлі мылтықпен басынан атқан.
Жарақат алған азаматша сол жерде қайтыс болды.
Түркістан облысының қылмыстық істер жөніндегі мамандандырылған ауданаралық сотының 2022 жылғы 27 сәуірдегі үкімімен айыпталушы С-ға Қылмыстық кодексінің 99-бабымен 18 жылға бас бостандығынан айыру жазасы тағайындалды.