Түркістан әуежайына барар жол бойына қара өрік отырғызылды
Облыс әкімі Өмірзақ Шөкеевтің тапсырмасымен қолға алынған жобаның нәтижесінде үш жылдан соң 1 гектардан 20 тоннаға дейін өнім алуға болады. Мұнда жергілікті ауа-райына қолайлы қара өріктің Black Splendоr, Black Diamond және Angeleno секілді ең шырынды сұрыптары егілді.
Өңір басшысы жобаның жүзеге асырылуын пысықтады. Бұл аумаққа қосымша қауын егуге болатынын айтып, осыған орай арнайы мамандарды тартуды тапсырды. Кентау қаласына қарасты Шаға ауылдық округінің аумағына жайғасқан жайқалған бау-бақша «Түркістан» ЭКК» АҚ мен «Dala – Fruit.kz» ЖШС бірлескен күшімен іске асырылуда.
Қаладағы құрылыс алаңдарын аралаған облыс әкімі жаңадан салынып жатқан ғимараттарда болып, құрылысшылармен кездесті. Мәдени-рухани орталықтың қайталанбас үлгісін сақтауды тапсырған Ө. Шөкеев құрылысты белгіленген мерзімге сәйкес тапсыруды жүктеді. Ең алдымен сапаға баса мән беруді міндеттеді.